مالیې وزارت: تېرو دوو میاشتو کې څه د پاڅه ۳۰ زره بې اسناده موټر ثبت شوي
په افغانستان کې د بې اسناده یا یو کلي موټرو ثبت او محصول ته ټاکل شوې نېټه پرون د چهارشنبې په ورځ پای ته ورسېده.
د بې اسنادو موټرو د ثبت لړۍ پیلېدو سره سم، دوه میاشتې وړاندې افغان حکومت وویل، دا کار یې د غیر قانوني موټرو د تګ راتګ د مخنیوي په موخه کړی دی.
اوس مالیې وزارت وایي، تېرو دوو میاشتو کې یې ۳۰زره او ۲۲۰بې اسناده موټر ثبت کړي چې له دې شمېر یې، ۲۳ زره موټرو څخه ګمرکي محصول اخېستل شوی دی.
د دې وزارت د اطلاعاتو مسوول فرالدین معرفتي ازادي راډیو ته وویل، له یادو موټر د ګمرکي محصول اخېستو سره، د دولت عوایدو کې یو میلیارد او ۴۰۰ میلیونه افغانۍ زیاتوالی راغلی دی: "د بې اسنادو یا یو کلي موټرو د ثبت لړۍ له پیل څخه تر دې دمه څه د پاڅه ۳۰ زره موټرونه ثبت شوي چې له دې ډلې ۲۳ زره محصول شوي. د محصول په پایله کې یو میلیارډ او ۴۲۵ میلیونه افغانۍ ټولې شوي. "
افغان حکومت په دې موده کې یوازې د ۱۹۹۱ تر ۲۰۱۹ ماډل درلودونکي موټر ثبت او محصول کړي دي.
د مالیې وزارت مسوولان وایي، کارکوونکي یې هره ورځ له ۸۰۰ څخه تر ۹۰۰ بې اسناده موټر ثبت او محصولوي.
د دې وزارت د اطلاعاتو د مسوول په خبره، د بې اسنادو موټرو د ثبت لړۍ یوه میاشت نوره هم تمدید شوه، خو که تر دې نېټې هم هغو کسانو چې موټر یې اسناد نه لري، خپل موټر ثبت نه کړل، دوه چنده جریمه به پرې کوي.
له دې وړاندې افغان دولت د بې اسناده موټرو د ثبت او محصول لپاره ځانګړی کمښت په پام کې نیولی و.
د ۱۹۹۱ تر ۲۰۰۰ ماډل لرونکو بې اسناده موټرو د ثبت او محصول لپاره ۸۵ سلنه، له ۲۰۰۰ تر ۲۰۱۰ ماډل لرونکو لپاره ۷۵ سلنه او له ۲۰۱۱ څخه تر ۲۰۱۹ ماډل لرونکو موټرو لپاره ۳۵ سلنه کمښت په پام کې نیول شوی وو.
د دې موټرو د ثبت له پیل سره هممهاله، د ولسمشر لومړي مرستیال امرالله صالح د شپږ نیمو بجو غونډو په راپور کې ولیکل، د بې اسنادو موټرو د ثبت وروسته به د افغانستان لاس خلاف موټرو ته هم امنیتي سند ورکړي، خو څښتنان به یې مالیې وزارت ته په بدل کې مالیه ورکوي.
اوس د مالیې وزارت وایي، د یادو موټرو د ثبت مېکانیزم به هم له بشپړېدو وروسته پلې شي.