World News in Chechen

Оьрсийчоьнан эскарша Нохчийчохь операцеш дIахьочу заманчохь лечкъийначу нехан хьокъехь ша бина сацам бовзийтина адамийн бакъонашкахула йолчу Европан кхело. Цаьрга дехар динчу 20 тобанна кхачийна цхьа миллион ах миллион сов евро компенсаци (1534 750 евро). 2001-чу шарера 2005-чу шаре кхаччалц идийначу нехан гIуллакхаш листинера Еврокхело. Нохчийчохь байначу Асхабов Ваитан а, Мурдалов Шамханан а, Макаев Рустаман а, Сагдаев Адаман а, Эдильсултанов Русланан а, ЯхъяевгIеран вежарийн Салахьан а, Анзоран а, Ойбуев Ризванан а, Эльжуркаев Мохьмадан а, Дударкаев Зайндин а, Межидов Мохьмад-Эмин а, ШахидовгIеран Хьамзатан а, Ахъядан а, Исраилов Мохьмадан а, Исиев Разамбекан а, Лимаев Мовсаран а, Минцалигов Мусан а, Яхъяев Вахьидан а, Заурбеков Мусан а, Абдурзаков Асламбекан а, Исаев Сайханан а гергарчара арз динера Европан кхелахошка. Читать дальше...

Хьалхе дуьйнна план хIоттийна, вийна ву СаIуда Iаьрбийчура оппозицин журналист Хашогги Джамал аьлла, дIахьедина Туркойчоьнан президенто ЭрдохIан Реджепа. СаIудахойн консулаллин хIусам чохь вийна иза политикан бух тIехь аьлла ЭрдохIана туркойн парламентехь вистхуьлуш. СаIуда Iаьрбийчуьра ши тоба хилла иза вуьйш аьлла хета Туркойчоьнан президентна. Шайлахь инарлаш болуш итт стагах лаьтташ хилла цхьа тоба. Хашогги вен цхьа де диссинчу заманчохь Туркойчу баьхкинера уьш. ЭрдохIан тешна ву, журрналист вен хан а, меттиг а цара хьалхе дуьйнна билгалъяьккхина хиларх. Читать дальше...

Пачхьалкх кризисехь юйла гойту кавказхошна юкъабуьйлучу цакхетамаша Нохчийчоьнний, ГIалгIайчоьнний цIеххьашха юкъадоьллачу дар-дацарша Оьрсийчоь йоха хьагIна юйла гойту, аьлла хета цхьаболчу экспертпшна. Эзарнашкахь адам Магасан майданашка даьккхира шина республико лаьттан коржамаш вовшашка дIасаяларо. Дагахь а доцуш иккхина протест шен пачхьалкхехь йоцуш санна, тийнна дIалатта йисира Москох. "Уьш регионаша луьсту гIуллакхаш ду, хIунда аьлча, юьйцург ГIалгIайчоьнан векалша лаьцна позици ю, цундела хьал луьстург а ГIалгIайчоьнан Iедал ду",  дIахьедира президентан пресс-гIоьнчас Песков Дмитрийс. Читать дальше...

Дагестанерчу Дербентехь гIишлош ен майданахь кхаа белхахочун декъий карийна. "Локхаллера чуэгна хиларан билгалонаш ю церан догIмаш тIехь. Хилларг зен Iалашонца талламчийн тоба хьажийна цу меттиге", - аьлла, дийцина Дагестанерчу чоьхьарчу гIуллакхийн министраллан пресс-гIуллакххоша. Азербайджанан бахархой хилла уьш.

Журналист Хашогги Жамал вийна хилар бакъ ду, иза "Iаламат доккха гIалат а ду", аьлла зуламах дарединчу СаIудийн Iедало. Истамулерчу шайн векалтехь СаIудийн ницкъаша ларамза вийна иза, боху Эр-Риядо.

Ша дина бер совгIатна ГIебарта-Балккхаройчоьнан Нарткаларчу яхархочунна дIадаларна набахтехь даккха 4 шо хан тоьхна Нохчийчуьрчу яхархочунна. Регионерчу прокуратуран пресс-гIуллакххоша бина и хаам. Кхелахоша къасторца, 2016-чу шарахь марехь йоцуш Нохчийчохь бер дуьненчу а даьккхина, шен гергарчарех шегара даьлларг къайладаккхархьама ГIебарта-Балкхаройчохь цхьана зудчунна дIаделла хилла цо иза. ГIуллакх теллинчул тIаьхьа, къона нана бехкехилар тIе а чIагIдина,4 шарна набахте хьажийна иза.

Оршотдийнахь йоьдучу кхеташонехь адвокатийн Ибриева Хедин а, Сабинин Андрейн а гIо тIе ца эца сацамбина гIалгIайн оппозиционеро Хазбиев Мохьмада. Кхелахочо пхи де хан елла цунна, керла адвокат лаца. Нагахь оцу заманчохь цунна ца каравахь, шаьш шайн адвокат лур ву аьлла суьдхочо. Оршотдийнахь Хазбиев Мохьмадан довхоттучу баьхкинера меттигерчу "Мемориал" офисан куьйгалхо Акиев Тимур а, Хазбиевн гергарнаш а, накъостий а. РогIера кхелан кхеташо тIедогIучу оршотдийнахь хир ю аьлла, дIакхайкхийна. Дуккха а шераш ду Хазбиев Мохьмад ГIалгIайчоьнан Iедалца къийсало, бахархой протестан гуламашка бохуш. Читать дальше...

Маршо Радион таханлера боцца хаамаш

Маьхза хIусамашка сатуьйсу аферисташ Iорабаха аьлла, Нохчийчоьнан куьйгалхочо Кадыров Рамзана тIедиллар, юкъарчу Iойленашкахь талламаш беш, цу чуьра нах ара а бохуш, дирзи. Меттигерчу бахархоша хаамбарца, оцу хIусамашкара нах шайн гергарчу нахе дIаоьхуьйтуш бу, яздо "Кавказан узел" агенталло. Карарчу беттан 15-чохь Кадыровс дIаяьхьначу кхеташонехь Соьлжа-ГIаларчу юкъарчу Iойленашкахь талламаш бай, цу чохь Iен бакъо йоцурш чуьра ара а бахий, хIусамаш яла билгалбаьхначу нехан тептарера дIабаха аьлла, тIедиллинера хьаькамашна. Читать дальше...

Оьрсийчоьнан чоьхьарчу гIуллакхийн министраллан Ростов кIоштарчу декъо комендантан сахьт чIагIдар дехна, хаамбо "Коммерсанто". 16 шо кхаччалц долчу берашна хIоттийна низам 18 шо кхаччалц болчу кегийрхошлахь а дIасадаржийна хила догIу аьлла цара. Цул совнах 7 шаре даллалц долу бер воккхачун тергонехь доцуш урамехь лелийтар а дихкина. Карарчу хенахь Ростов кIоштахь буса 10 сахьт даьлча Iуьйранна 6 сахьт даллалц баккхийнаш цхьана а боцуш 16 шо кхачанза кхиазхой арахь хила йиш яц. Низамаш хьоьшучу дена-нанна юкъадаьккхина гIуда. Читать дальше...