جرمني کې د روغتون تازه اعلامیه: ناوالني په 'نوویچوک' زهري موادو مسموم شوی و
د کرملېن د مخکښ مخالف الکسي ناوالني د مسمومېدو په اړه د هغه روغتون وروستۍ نتیجه خپره شوې ده چې دی پهکې بستر و او تر دې پېښې دوه ورځې مخکې په خپله ناوالني یوه وېډیو خپره کړه چې پهکې دی د روسیې د استخباراتو د یوه غړي له خولې خبرې اخلي.
جرمني روغتون په خپله نوې خبرپاڼه کې ویلي دي چې الکسي ناوالني د نوویچوک د اعصابو په ګاز مسموم شوی و.
ناوالني د اګسټ په ۲۰مه د روسیې دننه د کورنۍ الوتنې پر مهال په الوتکه کې سخت ناروغه شو، بیا په سایبریا کې د اومسک ښار په روغتون کې بستر شو چې وروسته جرمني ته د درملنې لپاره انتقال شو.
دي لانسیت طبي ژورنال د چهارشنبې په ورځ په پلازمېنه برلین کې د شاریتیه روغتون د ډاکترانو له لوري د ناوالني د درملنې تفصیل خپور کړ.
په دې راپور کې راغلي چې د جرمني یوه نظامي لابراتوار چې د کیمیاوي وسلو د پراختیا د مخنیوي د سازمان له لوري دنده ورسپارل شوې وه د ناوالني په وینه کې د نوویچوک زهري اثار تشخیص کړل.
د جرمني دا روغتون وایي چې ۴۴ کلن ناوالني له مرګه وژغورل شو او ښایي علتیې هم دا وي چې کله دی مسمومېده هغه وختیې صحت ښه و.
د لوېدیځ یو شمېر نورو لابراتوارونو هم ورته نتیجه مخکې اخیستې وه.
نوویچوک ماده د پخواني شوروي اتحاد په وخت جوړه شوې وه او یوازې روسیه کولای شي چې کنټرولیې کړي.
مسکو بیا بیا د ناوالني د مسمومېدو خبر رد کړی دی.
ناوالني د ده د مسمومیت په اړه د تازه راپور تر خپرېدو دوه ورځې مخکې د روسیې د فدرالي امنیت د خدماتو د ادارې له یوه مشکوک غړي سره د خپلو خبرو یوه وېډیو خپره کړې وه.
دا غړی د ټیلیفوني مکالمې پر مهال وایي چې استخباراتو د نوویچوک ماده سایبریا ته د ناوالني د سفر پر مهال د هغه په داخلي جامو کې ایښې ده.
ناوالني وویل چې ده د فدرالي امنیت د خدماتو د ادارې دې غړي ته ځان د امنیت شورا غړی معرفي کړی و څو په دې ډول له ده خبرې واخلي.