امرالله صالح له کابل ښاریانو بخښنه وغوښته
سخت امنیتي تدابیر، تنګ سړکونه، د ترافیکي قوانینو نه مراعتول او د واټونو بندول د کابل ښاریانو هر ورځنۍ ستونزه ده.
د امنیتي چارواکو تګ راتګ او دغه شان په دوی پورې اړوندو مراسمو او محفلونو ته د امنیتي تدابیرو نیولو دا ستونزه لا زیاته کړې.
تازه پرون مازدیګر ویل کېږي، چې د کابل په اینټرکانټیننټال هوټل کې د ولسمشر د لومړي مرستیال امرالله صالح د زوی د واده له امله دغه هوټل او باغ بالا سیمې غځېدلی واټونه تړلي وو او خلک د دېر وخت لپاره د سرکونو پر سر په خپلو موټرو کې پاتې شول.
دغه چارې د ښاغلي صالح پر وړاندې ګڼې نیوکې راوپارولې، هغه څوک چې خپله یې په دې وروستیو کې د کابل ښار د لاربندیو د کمولو لپاره د پلان جوړونې مسوولیت اخیستی.
د خواله رسنیو ډیریو کاروونکو د دغو لاربندیو عکسونه خپاره کړي او ویلي یې دي، چې څنګه دغه لاربندۍ رامنځته شوي.
خو ښاغلي صالح په خپله فېسبوک پاڼه د دې ټینګار تر څنګ چې د لارو د تړلو لپاره یې هېڅ چا ته لارښوونه نه وه کړې، له خلکو له دې امله بخښنه هم غوښتې.
هغه لیکلي چې ((باغ بالا واټ هېڅ کله هم صاف او خلاص نه و. )) او زیاته کړې یې ده چې ښایې د لوړ پوړو مېلمنو تګ راتګ د لارو د بندیو لامل شوی وي.
خو دا یوازې د تېرې شپې ستونزه نه ده، کابل ښاریان وايي، کله هم چې دولتي چارواکي له یو ځای بل ځای ځي د امنیتي تدابیرو له امله لارې ورته تړل کېږي.
عبدالرقیب زاهد چې له دغه حاله ستړي شوي وایي: "پرون هم یو محفل و زه ښار ته تلم خو لاره بنده وه، تقریباً یو ساعت کې هم ونه توانېدم چې خپل کار ته ورسېږم، دا ستونزه د یو کال نه ده څو کلونو کېږي چې همدا حال دی."
دغه راز ناطق حسيني وويل: "د څو دولتي چارواکو لپاره د لارو تړل تېروتنه ده، همدا ولس دی چې دولت دی، باید د یو دولتي کس لپاره چې په یوه لاره تېرېږي لاره ونه وتړل شي، دولتي چارواکي باید له یوې مشخصې لارې او په یو مشخص وخت تېر شي تر څو خلکو ته ستونزې جوړې نه کړي."
کابل ښاریانو په وار وار دا انتقادونه کړي دي خو ښايي په کابل کې د نفوسو زیاتوالی او په خاصو وختونو کې د موتر ډېر شمېر د لارو د بندېدو نور لاملونه وي، چې دغه ستونزه یې لا سخته کړې ده او مسوولین یې هواري کې پاتې راغلي دي.