Участокларга Дәүләт Думасы сайлаулары өчен бюллетеньнәр китерә башладылар
(Казан, 6 сентябрь, «Татар-информ», Алексей Угаров). Татарстанда бюллетеньнәрне сайлау участокларына китерә башладылар. Якын көннәрдә аның 6 миллионнан артык данәсен барлык территориаль сайлау участокларына алып киләчәкләр, шуннан участок комиссияләренә таратачаклар. ТР Үзәк сайлау комиссиясе рәисе Андрей Кондратьев шулай дип белдерде. «Бюллетеньнәр китерү этабы – алда торган тавыш бирүгә әзерлекнең мөһим өлешләреннән берсе. Без сайлаучылар алдындагы җаваплылыкны аңлыйбыз, шунлыктан һәр этапны контрольдә тотабыз», - диде Кондратьев. Ул билгеләп үткәнчә, бюллетеньнәр ТР Үзәк сайлау комиссиясе әгъзалары катнашында таратыла. Бу контрольне тәэмин итү өчен кирәк. «Сайлау бюллетеньнәре Татарстан районнарына „Баш махсус элемтә үзәге“ федераль дәүләт унитар предприятиесе хезмәткәрләре сагы астында китереләчәк», - дип искәртте Кондратьев. Сигезенче чакырылыш РФ Дәүләт Думасына сайлаулар 17, 18 һәм 19 сентябрьдә узачак. Шулай ук Татарстанның кайбер округларында ТР Дәүләт Советына һәм җирле хакимият органнарына өстәмә сайлаулар үтәчәк.