«Тәмле Казан» фестивалендә татар әбиләре беренче тапкыр шеф-поварлар белән ярышачак
(Казан, 6 сентябрь, «Татар-информ», Эльза Кузнецова). «Тәмле Казан» гастрономик фестивалендә беренче тапкыр «Татар әбиләре шеф-поварларга каршы» дигән гастрономик шоу-ярыш узачак. Чара 18-19 сентябрьдә Игенчеләр сарае каршындагы мәйданда оештырыла. Шәһәрнең Туризмны үстерү комитеты директоры Дарья Санникова эшлекле дүшәмбе киңәшмәсендә шул хакта хәбәр итте. «Тәмле Казан» фестиваленең программасы төрледән-төрле тәм-томнарны, концерт программасын, бәйгеләр, бүләкләр, әйдәп баручы шеф-поварларның мастер-классларын үз эченә ала. «Быел Татарстанның милли ризыкларын һәм көзге уңышны тәкъдим итүгә аерым басым ясалачак. Фермерларның продуктын файдаланучы туклану нокталары махсус билгеләр белән билгеләп үтеләчәк», - дип искәртте докладчы. Моннан тыш, ТР Авыл хуҗалыгы һәм азык-төлек министрлыгы ярдәмендә «Тәмле Казан» фестивалендә «Россия тәмнәре» азык-төлек продуктлары брендлары бәйгесенә чакырылган предприятиеләр дә катнаша. Алар арасында ит продукциясе һәм тәм-томнар, сыр җитештерүчеләр, хәтта виноград эчемлекләре әзерләүчеләр дә бар. Боларның барысын да фестивальдә татып карап, ә күңелгә хуш килгән продукцияне сатып алып булачак. Фестиваль 2016 елдан бирле үткәрелә. Беренче елда әлеге чарада – 20 мең, ә 2019 елда 65 меңнән артык кеше кунак булган. Фестивальнең төп максаты – Казан һәм анда яшәүче халыкларның гастрономик күптөрлелеген күрсәтү.