30 августта Казансу акваториясе буйлап кече суднолар хәрәкәтен тыячаклар
(Казан, 18 август, «Татар-информ»). 30 августта Татарстан башкаласында Казансу акваториясе буйлап кече суднолар хәрәкәте чикләнәчәк. Республика һәм шәһәр көне уңаеннан салют үткәрелү сәбәпле, елга участогы ябылачак. Тиешле карарны Татарстан Республикасы премьер-министры Алексей Песошин имзалады.
Тыю 21:30 сәгатьтән 22:30 сәгатькә кадәр Казансу елгасы участогында Миллениум күпереннән Киров дамбасына кадәр гамәлдә булачак. Чикләүләр шулай ук җилкәнле, прогулка, спорт судноларын, шул исәптән байдарка, гидроцикллар һәм ишкәкле көймәләрне куллануга кертелә.
Тыю бәйрәм салютын әзерләүдә һәм уздыруда катнашачак судноларга кагылмый.