2021 елда 400дән артык шәкерт татар онлайн-мәдрәсәсен тәмамлады
(Казан, 26 декабрь, «Татар-информ»). 2021 ел Татарстан мөфтияте һәм «Хозур» нәшрият йорты тарафыннан татар телендә беренче онлайн-мәдрәсә эшли башлады. Гыйнвар аеннан алып онлайн-мәдрәсә сайтына 50 000 шәкерт кереп укыган. Шуларның 400е укуын башыннан алып ахырына кадәр тәмамлаган һәм ислам нигезләрен үзләштергән.
ТР Диния нәзарәте матбугат хезмәте хәбәр итүенчә, онлайн-мәдрәсәдә укучыларның 35 проценты — 44 яшькә кадәр. Укучыларның 64 проценты — хатын-кызлар.
Россия татарларыннан тыш, порталдан 300дән алып 1000 кешегә кадәр Казахстан, Үзбәкстан, Кыргызстан, Австралия, АКШтагы милләттәшләр дә файдаланды. Европа, Азия, Төньяк Американың башка илләреннән файдаланучылар саны — 100дән ким. Укучыларның 71 проценты сайтка смартфоннар аша керә.
Онлайн-мәдрәсәдә укучыларны беренче чиратта «Татарларда Ислам тарихы» (курсны 4300 кеше тыңлады), тәҗвид (3200 кеше укыды), тәфсир (2300 кеше) дәресләре кызыксындырган.