Саратовта Пушкинның танылган әсәрләрен гарәп телендә сөйләделәр
(Казан, 20 декабрь, «Татар-информ»). Саратовта «Пушкин гарәп телендә һәм алай гына да түгел» дип исемләнгән әдәби кичә узды. «Яңарыш» мәдәни-агарту оешмасы чарасында Пушкинның танылган әсәрләре гарәп телендә яңгырады. Россия Мөфтиләр шурасы сайтында хәбәр ителгәнчә, чара 18 декабрьдә билгеләп үтелә торган Халыкара гарәп теле көне, шулай ук ил һәм дөнья әдәбияты классигы Александр Пушкинның тууына 222 ел тулу уңаеннан уздырылган. Александр Пушкинның мөселман цивилизациясе белән кызыксынуы, аның изге Коръәнне аңларга һәм аның мәгънәсен укучыларга тапшырырга омтылуы, шулай ук гарәп әдәбиятының рус классигы иҗатына йогынтысы турында Саратов Дәүләт техник университетының Халыкара коммуникацияләр идарәсе хезмәткәре, Саратов Җәмигъ мәчете каршындагы «Мәктәп» якшәмбе мәктәбе укытучысы Алексей Моратов сөйләде. Шулай ук «Яңарыш» активистлары ил һәм дөнья әдәбияты классигының инглиз, алман, рус, татар, казах, лезгин һәм үзбәк телләрендә танылган шигырьләрен укыды. Исегезгә төшерәбез, 1973 елның 18 декабрендә Берләшкән Милләтләр Оешмасы Генераль Ассамблеясы Генераль Ассамблеяның рәсми һәм эш телләре исемлегенә гарәп телен кертү турында резолюция кабул итте. Бүген гарәп теле дөньяда иң киң таралган телләрнең берсе булып тора, диелә хәбәрдә.