Татарстанда быел 2 меңнән артык социаль объект югары тизлекле интернетка тоташтырылды
(Казан, 2 ноябрь, «Татар-информ», Светлана Лаврентьева). Татарстан Республикасында өч ел эчендә югары тизлекле интернетка җепселле-оптик элемтә линияләре аша 3,5 мең социаль әһәмияткә ия объект, шуларның 2 меңнән артыгы быел, тоташтырылды. Бу хакта журналистларга Татарстан Республикасы Министрлар Кабинетында узган брифингта Татарстан Республикасы Дәүләт идарәсен цифрлы нигездә үстерү, мәгълүмат технологияләре һәм элемтә министры урынбасары Альберт Яковлев хәбәр итте. «Алдагы ике елда югары тизлекле интернетка 1231 объект тоташтырылды, әмма эшнең төп күләме 2021 елга туры килде. Быел 2296 объект тоташтырылды. Бу алдан планлаштырылганнан 79 процентка күбрәк», — диде Яковлев. Аның сүзләренә караганда, 2021 елда проект кысаларында рекордлы 1450 километр оптик элемтә линияләре салынган. 3 ел эчендә оптик элемтә линияләрен төзү күләме 16 тапкыр арткан. «Беренче чиратта, барлык мәктәпләрне, фельдшер-акушерлык пунктларын, авыл җирлекләре администрацияләрен киң полосалы интернетка тоташтыру 100 процентка үтәлүе бу эшнең нәтиҗәсе булып тора», — диде спикер. Аның сүзләренчә, Татарстан тоташтырыла торган социаль әһәмиятле объектлар саны буенча Россия төбәкләре арасында беренче урында тора. Социаль әһәмиятле объектларны Интернет челтәренә тоташтыру «Россия Федерациясенең цифрлы икътисады» илкүләм программасын гамәлгә ашыру кысаларында башкарылды. 2019 елда Россия Федерациясенең Цифрлы үсеш, элемтә һәм массакүләм коммуникацияләр министрлыгы ил төбәкләре буенча социаль әһәмиятле объектларны тоташтыру өчен элемтә операторын сайлау буенча конкурс үткәрде. Татарстан территориясендә конкурста «Таттелеком» компаниясе җиңде.