Минзәлә аэроклубы җитәкчесе һәлакәт турында: Бу безнең өчен шок

(Казан, 10 октябрь, «Татар-информ», Елена Сәлахова). Татарстан ДОСААФ Үзәк Аэроклубның Минзәлә филиалы җитәкчесе Равил Нурмөхәммәтов «Татар-информ» хәбәрчесенә Минзәләдә булган авиаһәлакәтне шәрехләде. Аерым алганда, ул самолет очучыларының барысын да дөрес эш итүләрен һәм фаҗига булдырмый калу өчен мөмкин булганны эшләүләрен әйтте.

«Алар югары квалификацияле очучылар, корабль командирлары, безнең даирәдә бик танылган кешеләр иде. Шуңа күрә алар тарафыннан хата булмаган дип әйтә алам. Тикшерү барысын да күрсәтер, бернинди шартлар да булмаган: бу самолет бик яхшы эшли иде. Бүген дә очыш алдыннан тикшерүләр булды, яхшы очып китте. 70 метр биеклектә двигательнең эшләми башлавы турында команда булды. Пилотлар инструкция буенча эш итте. Кызганыч, самолетны утырта алмадылар», — диде Равил Нурмөхәммәтов.

Аэроклуб җитәкчесе гадәттән тыш хәлләрнең мондый вариантлары элегрәк эшләнүен әйтте.

«Самолет яхшы проектлаштырылган, ул кырда да утыра ала, аннан очып та китә ала. Суга да, кырга да утырырга була — монда кеше факторын да, техник факторны да тикшерергә кирәк. Самолет төзек, кешеләр тәҗрибәле, төрле уйдырмалар булмасын өчен тикшерергә кирәк», — дип өстәде аэроклуб җитәкчесе.

Ул аэродромның 18 ел эшләвен, ун ел дәвамында аларда космонавтлар шөгыльләнүен дә әйтте.

«Монда дөнья чемпионаты, европа чемпионаты уздырылды. Без җитди документлар әйләнеше булган һәм техник базалы шактый җитди оешма. Бөтен кешеләр дә аттестацияле, безнең өчен бу шок булды», — дип йомгаклады Равил Нурмөхәммәтов.

Ул аэроклубның алга таба ничек эшләячәген әлегә белмәвен әйтте. Аның сүзләренчә, тикшерү барышында клуб эшчәнлеге туктап торачак.