په افغانستان کې ۳۰ زره جریبه ځمکه کې بڼونه جوړېږي
د دغه وزارت ویاند اکبر رستمي نن ازادي راډیو ته وویل چې دا مهال په یو شمېر ګرمسېرو ولایتونو کې د نیالګیو کېنولو کمپاین پیل شوی.
هغه زیاته کړه: "په ګرمو ولایتونو کې د مثمرو نیالګیو د کېنولو کمپاین پيل شوی او ټاکل شوې چې د حوت تر ۱۵مې دوام وکړي او وروسته به دغه کمپاین په سړو ولایتونو کې پيلېږي."
نوموړی زیاتوي چې د کرنې او مالدارۍ وزارت په پام کې لري چې روان کال شااوخوا ۲۰ میلیونه مثمر نیالونه په بزګرانو ووېشي.
د ښاغلي رستمي په خبره، په دغو مثمرو نیالونو کې مڼې، زردالو، انار، ګېلاس، ناک، شفتالو، انځر او ستروس نیالګي شامل دي.
د کرنې وزارت د معلوماتو په اساس چې تېر کال هم په شااوخوا ۳۰ زره جریبه ځمکه کې د تازه مېوو بڼونه جوړ شوي دي.