Новости за 24.09.2020

وروسته تر دې چې الکساندر لوکاشینکا د شپږم ځل لپاره د بلاروس د ولسمشر په توګه لوړه وکړه، په پلازمېنه مېنسک کې اعتراضونه پیل شول او د هغو هېوادونو لېست نور هم پسې اوږد شو چې په انتخاباتو کې د لوکاشینکا له بریالیتوب سره مخالفت کوي. الکساندر لوکاشینکا د دې سربېره د چهارشنبې په ورځ لوړه وکړه چې له څو اوونیو راهیسې په بې‌سارې توګه په بلاروس کې د ده پر ضد اعتراضونه روان وو او د اګسټ د نهمې نېټې په انتخاباتو کې یې د درغلیو تور پورې کاوه. د روسیې په دغه پخواني ایالت کې چې څه باندې نهه میلیونه نفوس لري،... Читать дальше...

ډیپلومات ډیپلومات خپرونې د افغانستان په سوله کې د چین د ونډې په اړه یو مطلب خپور کړی دی. مطلب کې راغلي، چین له وړاندې هم افغانستان ته ستراتېژیک ارزښت درلود او کله چې امریکایي ځواکونه وځي، پر افغانستان به د چین اغېز نور هم زیات شي. وړاندې راغلي، امریکا د ۲۰۲۱ کال تر نیمایي خپل ځواکونه باسي یا یې د ۲،۰۰۰ کچې ته راکموي، د لیکوال په باور له دې سره به د سیمې نور قدرتونه دې هڅه کې شي چې افغانستان کې پوځي او اقتصادي تشه ډکه کړي. مطلب کې چین د سیمې هغه اقتصادي قدرت یاد شوی چې غواړي له افغانستان نه د سوداګریز دهلېز یا کورېډور په توګه کار واخلي.

د ژغورونکو د هڅو سربېره د استرالیا په جنوب کې د تسمانیا ټاپو په اوبو کې ایسار شوي اکثر نهنګان تلف شوي دي. د دغو مړه شویو نهنګانو شمېر په دې سیمه کې نږدې ۵۰۰ ته رسېږي. اوس د دوی له ډلې د تقریباً ۳۸۰ نهنګانو مړینه تأیید شوې ده. دغه پيلوټ نومي نهنګان تر ډېره د استرالیا د جنوب په اوبو کې ژوند کوي. دغه نهنګان تر اوو مترو پورې اوږده وي او درې زره کیلوګرامه وزن لري.

بلغاریا له دوو روسي ډیپلوماتانو وغوښتل چې له دې هېواده ووځي. د بلغاریا د بهرنیو چارو وزارت د چهارشنبې په ورځ په یوه بیان کې دا ډیپلوماتان په نظامي جاسوسي تورن کړل او امر یې ورته وکړ چې په ۷۲ ساعتونو کې له بلغاریا خارج شي. په پلازمېنه صوفیه کې د روسیې سفارت ویلي دي چې مؤجه دلیل د دې ډیپلوماتانو د شړلو لپاره نه‌شته.

ازبکستان له ملګرو ملتونو وغوښتل چې د افغان سولې لپاره یوه کمېټه جوړه کړي. د ازبکستان ولسمشر شوکت میرضیایف د ملګرو ملتونو عمومي غونډې ته د چهارشنبې په ورځ وویل، دا کمېټه به د افغانستان د سولې چارې همغږه کوي او په دغه هېواد کې به د سیاسي روغې جوړې لپاره اسانتیاوې برابروي. ازبکستان یو له هغو هېوادونو څخه دی چې ښایي د افغان حکومت او طالبانو د سولې د روانو خبرو د یو دور مذاکراتو کوربه شي. تاشکند د ۲۰۱۸ کال په مارچ میاشت کې هم د افغانستان د سولې لپاره د یوې نړیوالې غونډې کوربه و.

په افغانستان کې د غوڅ ملاتړ مأموریت عمومي قوماندان ټینګار وکړ چې شخړې باید کمې شي. جنرال سکاټ مېلر کندهار ته د سفر پر مهال د چهارشنبې په ورځ وویل چې طالبانو بریدونه زیات کړي دي، دې ته د نړیوالې ټولنې پام دی او باید تاوتریخوالی راکم شي. کندهار ته په دې سفر کې له جنرال مېلر سره د افغانستان د کورنیو چارو سرپرست وزیر مسعود اندرابي او لوی درستیز محمد یاسین ضیا هم ملګرتیا وکړه.

د افغانستان فوټبال غوره لیګ نن د اتو لوبډلو په ګډون په کابل کې پیلېږي. د افغانستان د فوټبال فدراسیون مشر یوسف کارګر ازادي راډیو ته وویل چې لومړۍ لوبه به نن مازدیګر پنځه بجې پيل شي. هغه زیاته کړه: "له خیره سره نن پنځه بجې د توفان هریرود او اباسین څپې لوبډلو ترمنځ لوبه پيلېږي." د غوره لیګ د نهم دور دا لوبې سږ کال له ځان سره افغان حکومت او طالبانو ته د سولې پيغام لېږدوي. تمه ده چې یوه اوونۍ وروسته د ښځینه لوبغاړو غوره لیګ هم په کابل کې پیل شي.

د افغانستان ولسمشر وایي، تر وار له مخه اټکلونو د افغانانانو د کرونا تلفات کم دي ځکه چې کتلوي معافیت رامنځته شو او روغتیایي خدمتونه په وخت پیاوړي شول، خو محمد اشرف غني زیاته کړه چې د 'کووېډ-۱۹' ناروغۍ له امله ښایي تر رسمي شمېرو څو چنده تلفات زیات وي. د اقتصاد نړیوالې عمومي غونډې په نوښت د چهارشنبې په ورځ جوړې شوې غونډې ته ولسمشر غني د وېډیو کنفرانس له لارې وویل: "د رسمي شمېرو له مخې زموږ تلفات ۱،۴۴۶ دي او غیر رسمي ښایي ۷،۰۰۰ نور وي." ولسمشر غني اندېښنه وښوده که چېرته د کرونا ویروس مثبتې پېښې په ژمي کې ادامه پیدا کړي ستونزې به زیاتې کړي. Читать дальше...