Европерчу шен кIантана гIо дан гIоьртинчу нанас гечдар дехна

Францехь вехачу шен кIантана гIодархьама, нохчийн полисхоша йиттинера цунна аьлла, лоьрашкара кехат-тоьшалла дIакхачо гIоьртина ТIехьа-Мартанан яхархо Вадаева Кхокха, чIагIдо махкарчу "Грозный" телеканалан белхахоша. Республикан Iедалшна хьалха гечдар дехна ша зудчо а, цуьнан гергарчара а.


Шинаридийнахь меттигерчу телехьожийлан эфирехь сюжет гайтира, 2016-чу шарахь дуьйнна Францехь вехачу шайн кIантана лоьрашкара даьккхина харц тоьшалла дIакхачо гIортарх цуьнан гергарнаш. Юкъарчу хIусамчохь вехачу шен кIентан Iер-дахаран хьелаш тодархьама оьшуш дара и документ, яздо "Кавказский узел" агенталло.


"Нагахь и кехат цуьнга дIакхаьчнехь, гIуллакхаш дIанислур дара цуьнан. Ойла а ца еш динера ас иза, цунна гIоле хир ду моьттуш. Айса динарг нийса доцийла хаьа суна. Дохкояьлла", - аьлла Кхокхас.


Нохчийчуьра ара а даккхале, схьадаьккхина зудчуьнгара документ. Харц тоьшалла кечдинарш лоьху полицино. Вадаеван гергарчара чIагIдо, шайна хууш дацара цо лелочу "аферех" аьлла. "ЮьхьIаьржа ву со шуна хьалха. Суна цунах хууш дацара", - аьлла, билгалдаьккхина йоьдучу эфирехь зудчун гергарчу Авлургиев Халида.


Шайна тховкIело ялийтархьама, "Даймахкахь шаьш хьоьгучу баланех лаьцна, туьйранаш кхуллу цхьаболчу Нохчийчуьра Европе дIабахначу наха, шаьш ЛГБТ-н векалш ду бохурш а бу царлахь",  дуьйцу сюжетан авторша.