دوحه کې د سولې مذاکرات؛ طالبانو په ۱۹ ولایتونو کې جګړو ته زور ورکړی
د افغانستان دفاع وزارت وايي، چې د افغان حکومت د مذاکره کوونکي پلاوي او طالبانو ترمنځ د خبرو په درشل کې یادې وسله والې ډلې لا هم په لوړه کچه تاوتریخولي ته دوام ورکړی او په ۱۹ ولایتونو کې یې تازه بریدونه کړي.
که څه هم ټاکل شوې چې سبا د دوشنبې په ورځ به په قطر کې په رسمي ډول د افغان حکومت او طالبانو د مذاکره کوونکو پلاوو ترمنځ خبرې پیل شي خو د افغانستان دفاع وزارت وايي، چې روان حالت تر دې دمه په جګړو هېڅ اغېز نه دی کړی.
د دغه وزارت مرستیال ویاند فواد امان د یکشنبې په ورځ ازادي راډيو ته وویل، چې په تېرو ۲۴ ساعتونو کې طالبانو په ۱۹ ولایتونو کې بریدونه کړي.
امان زیاتوي: "د طالبانو له لوري په تاوتریخوالي کې هېڅ کمښت نه دی راغلی، اوس هم په لوړه کچه تاوتریخوالی دوام لري، افغان امنیتي او دفاعي ځواکونه د فعال دفاعي حالت په چوکاټ کې له خپل ځان دفاع کوي او د دښمن حملو ته ځواب ورکړی."
خو ښاغلي امان د جګړې له امله افغان سرتېرو، ولسي وګړو او طالبانو ته د اوښتو ځاني تلفاتو په اړه معلومات ورنه کړل.
بلخوا افغان چارواکو وايي، چې طالبانو بېګاه شپه د جوزجن ولایت د مینګجیک ولسوالۍ په ودانۍ او د کاپیسا ولایت تګاب ولسوالۍ د امنیې قومندانۍ په ودانۍ بریدونه کړي.
د طالبانو ویاند ذبیح الله مجاهد بیا وايي، چې دوی بریدونه نه دي کړي، بلکې له هغو سیمو کې یې دفاع کړې، چې افغان حکومت هلته تازه پوستې جوړه وي.
دا په داسې حال کې ده چې تېره ورځ په قطر کې د ښکېلو اړخونو ترمنځ د سولې د خبرو اترو په پرانستغونډه کې د ټولو اړخونو د استازو په خبرو کې ظاهراً نرمي لیدل کېده.
خبرې تر ډېره په اوربند او تلپاتې سولې متمرکزې وي.
خو پوښتنه داده چې د سولې د خبرواترو په درشل کې تاوتریخوالي دوام دغه خبرې له ګواښ سره مخ کولای شي؟
د افغانستان د سولې انسټېټوټ مشر يې د سولې د خبرو په زیان بولي.
د دې انسټېټوټ مشر یاسر احمدزي وویل: " طالبان د تاوتریخوالی په نه کمولو سره هڅه کوي، چې د خبرو په مېز کې زیات امتیاز واخلي او ځان پیاوی وښيي، دوی د جګړې له زیاتوالي په استفادې هڅه کوي، چې په مذاکراتو کې په مقابل لوري خپلې غوښتنې ومني."
په ورته وخت کې د افغانستان د سولې لپاره د امریکا د بهرنیو چارو وزارت ځانګړی استازي زلمي خلیلزاد ازادي راډيو ته وویل، ګومان کوي،چې ډېر ژر د تاوتریخوالی شدت راکم شي.
ټاکل شوې، چې سبا دوشنبه د قطر په پلازمېنه دوحه کې د افغان حکومت او د طالبانو ترمنځ د سولې رسمي مذاکرات پيل شي.