جنرال مکنزي: له افغانستانه د امريکايي ځواکونو وتل 'تېروتنه' وه
ښاغلي مکنزي له پولیتیکو مجلې سره په مرکه کې ویلي امریکا باید د افغانستان د سقوط د مخنیوي لپاره د خپلو ځواکونو یوه کوچنۍ برخه افغانستان کې ساتلي وای.
نوموړي دغه شان د دوحې د خبرو اترو پيل د افغانستان د سقوط يو مهم لامل وباله.
جنرال فرانک مکینزي وايي، په وروستۍ شېبه کې چې له طالبانو سره د خبرو لپاره دوحې ته ولاړ، ملا عبدالغني برادر ترې وغوښتل چې کابل ته د طالبانو تر راتګ مخکې امریکا دې د دغه ښار امنیت په غاړه واخلي – هغه څه چې چې طالبان یې ردوي.
د امریکا د مرکزي قوماندانۍ پخوانی قوماندان جنرال فرانک مکینزي وايي، د افغانستان د سقوط د مخنیوي لپاره په افغانستان کې د ۲۵۰۰ امریکايي سرتېرو د پاتې کېدو پلوي و.
ښاغلي مکنزي دغه خبره د طالبانو د واکمنۍ د یوه کال له پای ته رسېدو سره له پولیټیکو مجلې سره په خبرو کې وکړه.
نوموړي ویلي چې د امریکا ولسمشر جوبایډن ته یې ډېر پیغامونه لیکلي چې که امریکايي پوځیان له افغانستانه ووځي، د دغه هېواد د سقوط احتمال شته.
هغه په دې اړه وویل: "زما باور دا دی چې موږ باید هلته پاتې شوي وای. زه باور لرم چې هر څه چې پېښ شول د لومړۍ پرېکړې پایله وه. زما وړاندیز دا و چې موږ هلته محدود شتون ولرو ترڅو د افغانانو ملاتړ ته دوام ورکړو. خو دا مشوره ونه منل شوه."
تر دې مخکې د امریکا د متحدو ایالتونو ولسمشر جوبایډن څو څو ځله ویلي چې په افغانستان کې یې خپل هدف ترلاسه کړی دی.
نوموړی زیاتوي چې د امریکا او طالبانو تر منځ د دوحې له هوکړې وروسته د افغانستان پخواني حکومت په دې باور و چې امریکايي ځواکونه به له افغانستانه وځي او په پایله کې دوی له طالبانو سره د جګړې لپاره لازمه اراده درلوده.
د هغه په وينا، د دوحې د هوکړې پر مهال، چې کله قطر ته ولاړ، ملا عبدالغني برادر په وروستي فرصت کې له هغه وغوښتل، چې کابل ته د طالبانو تر ننوتلو پورې د کابل امنيت تامين کړي – هغه څه چې طالبان یې ردوي.
د طالبانو د حکومت ویاند ذبیح الله مجاهد ازادي راډیو ته وویل: "موږ دا ډول غوښتنه نه ده کړې، زموږ غوښتنه دا وه چې تر هغه وخته پورې چې د اسلامي امارت ځواکونه کابل ته را ننوځي، د کابل ادارې ځواکونه دې امنیت تامین کړي، څو په کابل ښار کې د ګډ وډۍ، غلا، بې نظمۍ او چور او چپاول لامل نه شي، خو دوی وتښتېدل او اسلامي امارت اړ شو چې خپلو ځواکونو ته د ښار د امنیت امر وکړي او موږ له امریکا څخه دا ډول غوښتنه نه ده کړې."
ښاغلي مکنزي ویلي، چې په کابل کې د القاعده شبکې د مشر ایمن الظواهري وژل کېدل د دوحې د هوکړې په اړه د طالبانو بد نیت څرګندوي.
له بلې خوا جمهوري غوښتونکي سناتور او د امریکا د سنا د بهرنیو اړیکو د کمېټې جګپوړي غړي جیم ریش د اګست په یوولسمه په یوه بیان کې وویل چې د طالبانو له لورې ایمن الظواهري ته پناه ورکول د دې ښکارندويي کوي چې د دوحې د تړون له امله پر طالبانو باور نه کېږي.
هغه وویل چې په افغانستان کې بشري وضعیت مخ په خرابېدو دی او له القاعدې سره د طالبانو اړیکې پیاوړې شوې دي.
دا څرګندونې په داسې حال کې کېږي چې امریکا د روان میلادي کال د اګست په لومړۍ نېټه اعلان وکړ چې د جولای په ۳۱مه د القاعده شبکې مشر ایمن الظواهري په کابل کې د بې پیلوټه الوتکې په برید کې وژل شوی دی.
طالبانو په دې وروستیو کې د دې څرګندونو په اړه څه نه دي ویلي، خو د الظواهري تر وژل کېدو ۱۱ ورځې وروسته دوی په کابل کې د هغه له شتون څخه ناخبري وښودله او د یوې اعلامیې په خپرولو سره یې ویلي، چې هيڅ هېواد ته به اجازه ورنه کړي، چې د افغانستان خاوره وکاروي.