د اوبو د کشالې د حل لپاره يو ايرانی پلاوی کابل ته تللی
په دې خبرو کې طالب مشرانو یو وار بیا ایراني پلاوي ته ډاډ ورکړ چې د اوبو په برخه کې به د دوو هېوادونو د ۱۳۵۱ لمریز کال موافقې ته ژمن پاتې شي.
له بلې خوا د افغانستان لپاره د ایران د ولسمشر ځانګړي استازي حسن کاظمي قُمي او په کابل کې د ایران سفیر بهادر امنیان د طالبانو له باندنیو چارو سرپرست وزیر امیرخان متقي سره وکتل.
د طالبانو د باندنیو چارو وزارت یوه ویاند حفیظ احمد تکل ازادي راډیو ته وویل چې ښاغلي متقي د ایران د ولسمشر له ځانګړي استازي سره په کتنه کې د اقتصادي راکړې ورکړې د زیاتېدو او په سوداګرۍ او ترانزیت کې د اسانتیاوو د ډېرېدو غوښتنه وکړه.
نوموړي وویل: "متقي صاحب په ایراني بانکونو کې د افغان تجارانو په پولي حسابونو باندې د لګېدلو محدودیتونو د لیرې کولو غوښتنه وکړه او په دغه برخه کې د افغان مهاجرینو او تجارانو ستونزې يې ورسره شریکې کړې."
د طالبانو د بهرنیو چارو وزارت وايي چې له ایراني لوري سره یې په ایران کې د بندي افغانانو د خلاصون او یا افغانستان ته د هغو د سپارلو په اړه هم خبرې شوي خو په دې اړه یې څه نه دي ویلي چې د ایراني لوري ځواب څه و.
له بلې خوا ایراني رسنۍ وايي چې د دغه هېواد د انرژۍ وزیر علي اکبر محرابیان له طالب چارواکو سره په ځانګړي ډول د اوبو او انرژۍ په اړه خبرې کړي دي.
د ایران د بهرنیو چارو وزیر په وروستیو کې وویل چې له ګاونډیو هېوادونو یعنې ترکیې او افغانستان څخه د خپلو اوبو حق غواړي او یو څاڅکی اوبه به چا ته ونه بخښي.
وروسته ایراني رسنیو تأیید کړه چې طالبانو په نیمروز ولایت کې د کمال خان بند اوبه ور خوشې کړي دي.
له بلې خوا باختر خبري اژانس د طالبانو د اوبو او انرژۍ د سرپرست وزیر عبداللطیف منصور په قول ویلي چې د ایران د انرژۍ وزیر ته یې وویل چې د طالبانو حکومت د هلمند سیند د اوبو په اړه د افغانستان او ایران د شاهي حکومتونو د اوبو تړون ته ژمن دی.
د ایران د انرژۍ وزیر بیا ویلي چې هېواد یې حاضر دی ترڅو افغانستان ته برېښنا صادره کړي او د اوبو او برېښنا په ځینو پروژو کې ونډه واخلي.
د افغانستان په شلو کې اويا برېښنا وارداتي ده، چې له ازبکستان، تاجکستان، ترکمنستان او ایران څخه برېښنا واردوي.