برښنا شرکت: د تاجکستان د برښنا نیم پور مو ورکړی
د برښنا شرکت مالي او اداري مشر اسدالله انعام وايي، له تاجکستان څخه د برښنا د واردولو په برخه کې ۷۹ میلیونه ډالره پوروړي دي، چې ۳۹ میلیونه ډالره یې تر اوسه ورکړي دي.
د انعام په خبره چې د تاجکستان د برښنا ۶ میلیونه ډالره پور به هم په نېږدې ورځو کې ورکړل شي.
هغه وویل: "موږ له تاجکستانه د جولای له اوله تر اوسه ۷۹ میلیونه ډالره پوروړي وو چې ۳۹ میلیونه ډالره مو ورکړي دي او ۳۹ میلیونه ډالره پاتې دي."
خو تازه د تاجکستان د برښنا ادارې مشر محمد عمر اسوزاده په یوه خبري کنفرانس کې ویلي چې افغانستان له تاجکستان څخه ۲۸ ميلیونه ډالره پوروړی دی چې د افغانستان برښنا شرکت تېره میاشت یوازې ۲ میلیونه ډالره د تاجکستان د برښنا ادارې حساب ته لېږلې دي.
اسدالله انعام په خبري ناسته کې څرګنده نه کړه، چې ولې د ده او د تاجکستان د برښنا د ادارې مشر په خبرو کې د ۱۲ میلیونه ډالرو پور توپير دی.
خو نوموړي ویلي، چې د برښنا شرکت د ګاونډيو هېوادونو او کورنیو شرکتونو ۱۵۱ میلیونه ډالره پورونه ورکړي خو ۱۲۲ میلیونه ډالره لا هم پوروړي دي.
انعام زیاتوي چې دوی په وخت سره د ټولو پورونو د ادا کولو وړتیا لري، خو په افغانستان کې د بانکي ستونزو له امله بریالي نه شول چې په وخت د تاجکستان پورونه ادا کړي.
د برښنا شرکت مسوولان وايي، په تېرو ۱۰ میاشتو کې په افغانستان کې د برښنا ۱۴ ستنې ویجاړې شوې دي، خو د برښنا شرکت په وخت سره بېرته ورغولې چې افغانانو ته د برښنا په رسولو کې ځنډ رانه شي.
خو د کابل په ګډون د ډېرو ولایتونو خلک د برښنا له کمښته شکایت کوي او وايي، چې دوامداره برښنا نه لري.
افغانستان خپله ډېره برښنا له تاجکستان، ازبکستان او ترکمنستان څخه واردوي.