د امريکا ولسمشر ډونالد ټرمپ پولنډ ته خپل سفر لغوه کړ
ولسمشر ټرمپ به په خپل هېواد کې پاتې شي، څو د دوريان په نوم د هغه توپان چاره وکړي چې په څو ورځو کې يې فلوريډا ايالت ته د ورتګ خطر شته.
ډونالد ټرمپ د پنجشنبې په ورځ په سپينه ماڼۍ کې وويل، د دې لپاره چې ډاډمنه شي چې د فډرال حکومتي ټولې منابع د توفان پر راتګ تمرکز کړى، پولنډ ته خپل سفر لغوه کوي.
ده وويل، پرېکړه يې کړې چې راتلونکې اوونۍ پولنډ ته خپل مرستيال مايک پنس ولېږي.
د امريکا ولسمشر ويلي، مهمه دا ده چې په واشنګټن کې پاتې شي او د هغه توفان د ستونزې چاره وکړي چې ممکن ډېر لوى هم وي.
په پام کې وه چې ولسمشر ټرمپ سبا د اګست پر ٣١مه د دوهمې نړيوالې جګړې د پيل د اتيايمې کليزې په مناسبت جوړو شويو مراسمو کې د ګډون لپاره د پولنډ پلازمېنې وارسا ته روان شي.