هرات، کندهار او هلمند کې واورو او بارانونو ۱۷ کسان وژلي
د هرات د والي ویاند جېلاني فرهاد ازادي راډیو ته وویل، په انجیل او ادرسکن کې د درنو واورو د ورېدو له کبله ۸ کسان وژل شوي دي.
فرهاد زیاته کړه: "په انجیل ولسوالۍ د واورو د ورېدو او د یو کور د نړېدو په پېښه کې د ېوې کورنۍ شپږ غړي مړه شوي دي او همداراز په ادرسکن ولسوالۍ کې د یو کور د نړېدو له کبله دوه کسان مړه شوي دي."
بل خوا د هرات امنیه قوماندان جنرال امین الله امېرخېل آزادۍ راډیو ته ویل چې د هرات- تورغنډۍ- هرات- اسلام کلا او هرات- کندهار لویې لارې د درنو واورو د ورېدو له کبله بندې شوې دي.
ب پلو د کندهار چارواکي وايي، په سپین بولدک ولسوالۍ کې د بارانونو له کبله د یو شمېر کورونو د نړیدو له کبله ۶ کسان وژل شوي او لس نور ټپيان دي.
د کندهار ولایت مطبوعاتي دفتر په یوه خبرپاڼه کې چې نن خپره شوه وايي چې په مړو کې درې ماشومان او درې ښځې دي.
د ولایت په خبرپاڼه کې له زیانمنو خلکو سره د مرستو یادونه هم شوې ده.
اخوا د هلمند ولايت په کجکي ولسوالۍ کې بارانونو او سيلابونو د يوې ميرمنې په ګډون ۳ کسان وژلي او درې نور یې ټپیان کړي دي.
د والي وياند عمرځواک ازادي راډیو ته وویل چې ځايي روغتيايي مسولين هڅه کوي له زيانمنو کسانو سره مرسته وکړي.
همداراز د هلمند د ناوې ولسوالۍ د خرابې په نوم سيمه کې هم د يو کور د دوه خونو چتونه لويدلي دي چې د زيان په اړه يې لا معلومات نشته.
په هلمند کې له پرون ورځې راهیسي سخت باران او سیلۍ دوام لري چي هوا يې هم ډېره سړه کړې ده.
د افغانستان د هوا پېژندنې ادارې د هیواد په لویدیځو، مرکزي او ځینو جنوبي سیمو کې د سختو واورو او بارانونو او همداراز د لارو د بندېدو او د سېلونو د جاري کېدو اټکل کړی دی.