حبيب الرحمن افغان: د آمر ستار وژنه سياسي اړخ لري
د دې قضيې د څېړنې لپاره د ګمارل شوي هيئت غړي، حبيب الرحمن افغان چې د ولسي جرګې استازى هم دى، نن ازادۍ راډيو ته وويل:
”د دې قضيې ځينې اړخونه سياسي دي. د هغې ډلې بې پروايي هم ښيي چې د عملياتو لپاره يوې سيمې ته ځي. په ځينو ارګانونو کې خودغرضه خلک شته چې له پوښتنو- ګروېږنو او محکمې ته يې له سپارلو پرته بېګناه کسان وژني.“
ادعا کېږي چې عبدالستار غوربندي چې په امر ستار هم مشهور و، پنځه ورځې مخکې په کابل کې د ملي امنيت يوې قطعې په عملياتو کې ووژل شو.
ولسمشر محمد اشرف غني د دې پېښې د څېړلو لپاره يو هيئت د ګمارلو سپارښتنه وکړه.
جمهوري رياست ويلي چې تر څېړنو وروسته به لازم اقدامات کېږي.