په کندز کې نن په یوه ولسي غونډه کې خلکو د اوربند غوښتنه وکړه
د افغانستان حکومت څو ورځې مخکې د خالد په نوم پوځي عملیات پیل کړل او ورپسې وسله والو طالبانو د الفتح عملیاتو د پیل اعلان وکړ.
په کندز کې په نننۍ غونډه کې خلکو له حکومت او طالبانو غوښتنه وکړه چې د روژې د درناوي لپاره اوربند وکړي.
دا په د اسې حال کې ده چې د افغانستان د سولې لپاره د امریکا د حکومت ځانګړی استازی زلمی خلیلزاد کابل او دوحې ته روان دی.
د امریکا د بهرنیو چارو وزارت پرون وویل چې خلیلزاد به افغانستان، هند، پاکستان، قطر، روسیې او انګلستان ته لاړ شي.
د خلیلزاد سفر د یکشنبې په ورځ پیل شوی او د مې میاشتې تر ۱۱مې به دا دوره بشپړه کړي
د امریکا د بهرنیو چارو وزارت ویلي چې خلیلزاد به په کابل کې د افغانستان د دولت له غړو او نورو افغانانو سره د سولې په اړه مشورې وکړي.
په افغانستان کې اوربند د سولې لپاره اساسي شرط ګڼل کېږي.