Новости за 10.03.2021

(Актаныш, 10 март, «Татар-информ», «Актаныш-информ», Ләйсән Тимерова). Көз көне башланган Татарстан беренчелегенә хоккейчыларның Алабуга шәһәрендә узган финал уеннары ачыклык кертте. Ярымфиналда Биектау командасы белән 6:2 исәбенә җиңү яулаган Актаныш «Лачын» командасы финалда җанатарларына тагын да сөенечле мизгелләр бүләк итте. Тарихи хәлиткеч уенда «Лачын»нар Лениногорскның «Нефтяник» командасын 4:0 исәбе белән җиңеп, чемпион калды. Бу турыда Актаныш районы мәгълүмат үзәге хәбәр итә. Хоккейчы... Читать дальше...

(Казан, 10 март, «Татар-информ»). Түбән Каманың «Гаилә» паркы үз мөмкинлекләрен киңәйтә. 1 майдан 2 сентябрьгә кадәр үзмәшгульләр өчен биредә бушлай палаткалар куелачак, алар шәһәр халкына үзләре җитештергән продукцияне сата алачак. Бу хакта инстаграмда үз битендә Түбән Кама муниципаль районы башкарма комитеты җитәкчесенең беренче урынбасары Радмир Беляев хәбәр итте. «Сәүдә урыннары тәкъдим итү үзмәшгульләргә ярдәм чараларының берсе булачак», — дип яза Радмир Беляев. Бүгенге көндә Түбән Камада 6419... Читать дальше...

(Казан, 10 март, «Татар-информ»). Россия Президенты Владимир Путин Министрлар Кабинетын төбәкләргә кирәкле күләмдә инвестиция җәлеп итүне тәэмин итәргә чакырды. Бу турыда РИА Новости хәбәр итә. «Әлбәттә, бу төбәкләргә кирәкле күләмдә инвестиция җәлеп итүне тәэмин итәргә кирәк. Бу базада төгәл максатчан күрсәткечләргә ирешүне, шул исәптә бу төбәкләрдә яшәүчеләрнең реаль керемен арттыруны тәэмин итәргә», — дип сөйләде Путин хөкүмәт әгъзалары белән видеоконференция режимында узган киңәшмәдә.

(Казан, 10 март, «Татар-информ», Эвелина Киселёва). Г.Камал исемендәге театр хезмәткәрләре коронавирустан прививка ясатты. Алар арасында 83 яшьлек актер Ринат Таҗетдинов та бар. Бу турыда Казанның 18нче хастаханәсенең Инстаграмда рәсми аккаунтында хәбәр ителә. «Минем яшисем килә, минем яшем дә бик яхшы. Миңа бөтен дөнья вакцинация өчен көрәшә, бөтен җирдә вакцина җитми кебек тоела, ә бездә зинһар өчен килегез дип торалар. „Спутник V“ — ул искиткеч вакцина, шуңа прививка ясатырга кирәк», — диде табибларга татар актеры. Читать дальше...

(Казан, 10 март, «Татар-информ»). ТР Дәүләт Советы Рәисе, «Бердәм Россия» партиясенең Татарстан бүлеге секретаре Фәрит Мөхәммәтшин Россия халыклары ассамблеясы башлыгы Светлана Смирнованы Татарстанга чакырды. Бу хакта республика парламенты матбугат хезмәте хәбәр итә. «Фәрит Мөхәммәтшин Светлана Смирнованы Татарстанга чакырды һәм республикада халыклар бердәмлеген саклау, милләтара тынычлыкны һәм конфессияара татулыкны ныгыту буенча эшнең ничек баруы белән җентекләп танышырга чакырды», — диделәр матбугат хезмәтендә. Читать дальше...

(Казан, 10 март, «Татар-информ»). Татарстанда коронавирустан тагын дүрт кеше үлгән. 1946, 1950, 1956 елда туган хатын-кызлар һәм 1957 елда туган ир-ат Covid-19 корбаны булган. «Үлем сәбәпләре патологоанатомик экспертиза нәтиҗәсендә ачыкланган. Вирус идентификацияләнгән», диелгән Татарстан Сәламәтлек саклау министрлыгы матбугат хезмәте хәбәрендә. Бүгенгә республикада ковидтан 371 үлем очрагы теркәлгән.

(Казан, 10 март, «Татар-информ», Гөлнар Гарифуллина). Янгын куркынычы чорында халыкның күпләп ял итү урыннарында урман инспекторлары кизү торачак.  Урман хуҗалыгы министры урынбасары Рәис Гомәров Дәүләт Советының Экология, табигатьтән файдалану, агросәнәгать һәм азык-төлек сәясәте комитеты утырышында янгын куркынычы сезонына әзерлек инде башланганын әйтте. «Халыкның күпләп ял итү урыннарында, урманнар белән янәшә федераль һәм төбәк әһәмиятендәге автомобиль юллары кырыенда инспекторлар һәм янгын сүндерү машиналары торачак»... Читать дальше...

(Казан, 10 март, «Татар-информ»). ТР Дәүләт Советы Рәисе, «Бердәм Россия»нең Татарстан бүлеге Секретаре Фәрит Мөхәммәтшин партиянең беренчел тавыш бирүнең федераль оештыру комитеты составына керде. Бу хакта республика парламентының матбугат хезмәте хәбәр итә. «Фәрит Мөхәммәтшин Дәүләт Думасына депутатлыкка кандидатлар күрсәтү өчен алдан тавыш бирүнең федераль оештыру комитеты составына кергән Россия төбәкләре вәкилләренең берсе булды», — диделәр матбугат хезмәтендә. Парламент җитәкчесе төбәкләрнең... Читать дальше...

(Казан, 10 март, «Татар-информ»). Россиядә яңа, мутацияләнгән коронавирус таралу куркынычы юк. Бу хакта Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтнең җитәкчесе Анна Поповага сылтама белән РИА Новости хәбәр итә. Аның сүзләренчә, коронавирусның үзгәрүчән булуы белән бәйле куркыныч бар. «Бүгенге көндә Россиядә яңа, үзгәргән вирусның киң таралуы көтелми», — диде Анна Попова Дәүләт Думасы комитеты утырышында.

(Чаллы, 10 март, «Татар-информ», Эльвира Мәхәммәтдинова). Чаллыда 14 068 кеше коронавирустан вакцинация узган. Бу хакта «Татар-информ”га шәһәрнең Сәламәтлек саклау идарәсендә хәбәр иттеләр. Вакцинация узучыларның 7699ы прививканың икенче этабын ясаткан. Поликлиникаларда чират юк, прививка ясатучыларны теләк белдергәч тә чакыртып алалар. Сәнәгать предприятиеләре арасында КАМАЗ зур активлык күрсәтә. Заводта эшләүче 2 292 хезмәткәргә прививканың беренче компонентын ясаганнар. 1 367 кешегә «Спутник V» препаратының икенче этабы ясалган. Читать дальше...

(Казан, 10 март, «Татар-информ», Полина Шевчук). Казанда биш катлы йорттагы янгын чыккан фатирда ир-ат мәете табылган. Янгын бүген кичке сәгать бишенчедә Тынычлык урамы 20/7 йортта өченче катта чыккан. Бу хакта «Татар-информ”га Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр. Янган сүндерүчеләр фатирда 72 яшьлек ир-ат мәетен тапкан. 2 кв метр мәйданда әйберләр янган. Янгын чыгу сәбәпләрен ачыклыйлар.

(Казан, 10 март, «Татар-информ»). Коронавирус белән авыручылар кимүгә карамастан, битлек режимыннан баш тартырга ярамый. Бу хакта Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтнең җитәкчесе Анна Поповага сылтама белән РИА Новости хәбәр итә. «Бүген чикләүләрне йомшарту өчен нигез юк, таләпләр, әлбәттә, битлек режимы кала», — диде ул Дәүләт Думасының Сәламәтлек саклау комитеты утырышында. Шулай ук ул Россиядә битлек кию дисциплинасы югары дәрәҗәдә булуын әйтте.

(Казан, 10 март, «Татар-информ»). Татарстан Инвестицион үсеш агентлыгында инвесторлар белән эшләү өчен алтын стандарт эшләгәннәр. Бу турыда Татарстан Инвестицион үсеш агентлыгы матбугат хезмәтендә сөйләделәр. «Безнең өчен гомуми эшне координацияләү һәм бу процесс белән идарә итү әһәмиятле, чөнки Татарстанның күпләр җәлеп ителгән төрле дәрәҗәдә структуралы бердәм инвестицион командасы бар. Татарстан инвесторлары бары тик төгәл мәгълүмат кына алырга тиеш, ә аларга сыйфатлы хезмәт күрсәтү –татарстанлылар... Читать дальше...

(Казан, 10 март, «Татар-информ», Надежда Гордеева). Күп көнлек тавыш бирүне уздыру мөмкинлеген күздә тоткан закон проекты йомгаклау укуында карау өчен әзерләнгән. Татарстан Дәүләт Советының Дәүләт төзелеше һәм җирле үзидарә комитеты закон проектын өченче укылышта кабул итәргә тәкъдим итте. Бу карар утырышта күпчелек тавыш белән хупланды. Парламент комитеты рәисе Альберт Хәбибуллин искәрткәнчә, Сайлау кодексына һәм Татарстанның аерым закон актларына үзгәрешләр кертә торган закон проекты 18 февральдә... Читать дальше...

(Казан, 10 март, «Татар-информ»). Евпатория мөселманнары борынгы мөселман зираты урынында шугалак ясауга каршы чыга. Спорт объекты өчен башка җир кишәрлеге сайлый алалар. Бу турыда республикадан Россия Дәүләт Думасына депутаты Руслан Бальбек сүзләренә сылтама белән «Интерфакс» хәбәр итә. «Миңа биредә бабалары җирләнгән дистәләгән кеше бу мәсхәрәләүгә юл куймауны сорап мөрәҗәгать итте. Евпатория хакимияте вәкилләре белән шугалак өчен башка урын сайлаячаклары турында килештек. Мин Кырым башлыгы Сергей... Читать дальше...

(Казан, 10 март, «Татар-информ», Гөлнар Гарифуллина). Татарстан Сәламәтлек саклау министрлыгының баш эпидемиологы Дмитрий Лопушов коронавирустан вакцинация вакытында алкогольдән тыелып тору кирәклеген әйтте. «Вакцинация вакытында алкогольне күп куллану антитәнчекләр бүленеп чыгуга тәэсир итә. Алкогольгә карамастан, антитәнчекләр барыбер формалашачак, тик исерткечне күп куллансаң, аларның бүленеп чыгуына энергия күбрәк сарыф ителәчәк», — диде Дмитрий Лопушов Инстаграмдагы аккаунтта тулы эфир барышында. Читать дальше...

(Казан, 10 март, «Татар-информ», Полина Шевчук). Казанда күпфатирлы йортта янгында бала зыян күргән. Бу турыда «Татар-информ» агентлыгына Татарстан прокурорының өлкән ярдәмчесе Руслан Галиев сөйләде. Массакүләм мәгълүмат чаралары белешмәләре буенча, янгын бүген Әмирхан проспектындагы йортларның берсендә чыккан. Янгында 16 яшьлек бала зыян күргән. Аны хастаханәгә салганнар. Якынча мәгълүмат буенча, янгын бала бүлмәсендә өстәлдә чыккан. Һәлакәт урынына Казанның Яңа Савин районы прокуроры Сергей Брынза килергә чыккан. Читать дальше...

(Казан, 10 март, «Татар-информ», Гадел Әхмәтҗанов). Тверь өлкәсендә быел узачак җанисәпкә кадәр һәр райондагы татарларның санын ачыкларга җыеналар. «Җанисәп алдыннан бөтен Тверь өлкәсен йөреп чыгарга ният бар. Хәзер кайда, күпме татар яшәгәнен белешеп район администрацияләренә хатлар язабыз. Аннан соң райондагы һәр татар белән очрашачакбыз. Алар белән күрешеп, аралашырга, „Татарлар: гамәл стратегиясе“ белән таныштырырга телибез», — диде Тверь өлкәсе татар милли-мәдәни автономиясе рәисе Марс Ибраһимов «Татар-информ» хәбәрчесенә. Читать дальше...

(Казан, 10 март, «Татар-информ»). Иҗтимагый оешмалар вәкилләрен һәм волонтерларны Татарстанда «Бердәм Россия»нең беренчел тавыш бирүен оештыру буенча төбәк комитеты составына кертергә планлаштыралар. Бу тәкъдимне партиянең Татарстан бүлеге җитәкчесе Фәрит Мөхәммәтшин хуплады. «Татарстанда волонтерлар актив, авыр тормыш хәленә эләккәннәргә ярдәм итү генә түгел, ә сәяси тәҗрибә дә алар җилкәсенә ятачак. Без аларга ярдәм итәчәкбез, сәяси нечкәлекләрне һәм алда торган Дума сайлауларының мөһимлеген аңлатачакбыз. Читать дальше...

(Казан, 10 март, «Татар-информ»). «Ак Бүре белән татар телен өйрәнәбез» мультфильмының яңа серияләрен бөтен гаилә белән карау яхшы гадәткә әверелде, аларның гомуми саны утызга якынлашып килә, дип хәбәр итә Бөтендөнья татар конгрессы матбугат хезмәте. Яңа сериядә бүре баласы беренче тапкыр инглиз телендә дә сөйләшә. Хәзер Ак Бүре һәм аның дуслары белән телләр һәм гореф-гадәтләр өйрәнергә тагын да җиңелрәк һәм кызыклырак. Мәскәү татарлары автономиясе сайтында берьюлы биш яңа серияне сылтама буенча карарга мөмкин. Читать дальше...

(Казан, 10 март, «Татар-информ», Гөлнар Гарифуллина). Бүген Камал театры хезмәткәрләре Казанның 18 нче шәһәр сырхауханәсендә коронавирустан прививка ясаткан. «Курыкмыйча яшәрлек булсын дидем», — дип әйткән театр актеры, Россиянең һәм Татарстанның халык артисты Ринат Таҗетдинов. Театр хезмәткәрләренең вакцинациясе турында Инстаграмда 18 нче хастаханәнең аккаунтында хәбәр ителә. «Ринат Таҗетдинов вакцинациягә тормыш иптәше һәм цех буенча коллегалары белән килде. Барысы да „Спутник V“ вакцинасы белән прививка ясатты», — диелә. Читать дальше...

(Казан, 10 март, «Татар-информ», Гадел Әхмәтҗанов). 26 һәм 27 мартта Тверь шәһәренең Сервис һәм туризм көллиятендә татар халык ашлары көннәрен уздырырга җыеналар. 26 мартта татар халык ашларын пешерү буенча осталык дәресе, 27 март көнне иң тәмле пешерүче остабикәләрне ачыклар өчен бәйге булачак дип көтелә. «Осталык дәресләрен Тверьдә яшәүче татар хатын-кызлары күрсәтәчәк. Икенче көнне узачак бәйгедә ризыкларга бәя бирә торган махсус комиссия дә була. Бу комиссиягә Тверьнең Сервис һәм туризм көллияте... Читать дальше...

(Казан, 10 март, «Татар-информ»). Екатеринбургта Свердловск өлкәсе мөселманнары Диния нәзарәте (Үзәк мөфтият) рәисе Абдул-Куддусс Ашарин Үзәк хәрби округы штабының дин тотучылар белән эшләү бүлеге җитәкчесе Константин Фальков белән очрашты. Алар Үзәк хәрби округның хәрби частьларендә ислам динен тотучы хәрби хезмәткәрләр белән эшләү өлкәсендә хезмәттәшлекне турында фикер алышты. Свердловск өлкәсе мөселманнары Диния нәзарәтеннән (Үзәк мөфтият) әлеге юнәлештәге эшчәнлек өчен план һәм җаваплы кеше билгеләнде. Читать дальше...

(Казан, 10 мара, «Татар-информ»). Татарстан Югары судының суд составы рәисе Рәис Абдуллин вафат булган. Аңа 64 яшь иде. Бу турыда суд сайтында хәбәр ителә. Рәис Абдуллин 39 елдан артык гомерен суд системасына багышлаган. Югары судта 1985 елдан бирле эшләгән, ике тапкыр Татарстан Судьялар советы составына сайланган. Ул Татарстанның атказанган юристы, Россиянең атказанган юристы исемнәренә ия булган. Татарстан Югары суды коллективы Рәис Абдуллинның туганнарының һәм якыннарының кайгысын уртаклаша. Читать дальше...

(Казан, 10 март, «Татар-информ»). Иртәгә, 11 мартта, Татарстанда янә салкынайтачак. Аязганда 32 градуска кадәр салкын булуы ихтимал, дип кисәтә синоптиклар. Республикада аязучан-болытлы һава булачак. Төнлә явым-төшем ихтималы аз, иртән һәм көндез бераз кар яварга мөмкин. Төнлә һәм иртән урыны белән томан төшәчәк, күз күреме 500 метрга һәм аннан да кимрәк начарлануы көтелә. Бу хакта Татарстан Гидрометеорология һәм әйләнә-тирә мохитне күзәтү үзәге хәбәр итә. Җил төньяк-көнбатыштан салмак кына исәчәк, ә көндез уртача тизлектә исәргә мөмкин. Читать дальше...