Татарстанда тәүлек эчендә коронавирусның 75 яңа очрагы ачыкланган
(Казан, 22 ноябрь, «Татар-информ»). Татарстанда тәүлек эчендә яңа коронавирус йогышы белән авыруның 75 яңа очрагы теркәлгән. Бу хакта ТР Сәламәтлек саклау министрлыгының матбугат хезмәте хәбәр итә. «Аларның 2се — читтән кертелгән, 73е элемтә юлы белән йоктырылган. 15 кеше хастаханәгә салынган, 60 кеше өйдә дәвалана», — диелә хәбәрдә. Авыручылар арасында иң күбе 30 яшьтән 50 яшькә кадәргеләр— алар 23 кеше, шулай ук 60тан 70 яшькә кадәр булганнар арасында 21 очрак ачыкланган. Бүгенге көндә Татарстанда Covid-19 инфекциясенең 9700 очрагы теркәлгән. 8464 кеше, шул исәптән 43 е узган тәүлек эчендә сәламәтләнде.