Мәскәүдә яшәүче Сабира Галимованы 100 яшьлек юбилее белән котладылар
(Казан, 11 ноябрь, «Татар-информ»). Шушы көннәрдә Мәскәүдә яшәүче тыл ветераны Сабира Галимова бер гасырлык юбилеен билгеләп үтте. Бөек Җиңүнең 75 еллыгы һәм ТАССР төзелүнең 100 еллыгы уңаеннан Татарстанның вәкаләтле вәкиллеге хәйрия акциясе үткәрде — бер гасырлык юбилейларын каршылаган Мәскәүдә яшәүче 100 ветеранны котлады. Бу хакта Татарстанның Россиядәге Тулы вәкаләтле вәкиллеге хәбәр итә.
Татарстан Республикасы Премьер-министры урынбасары-Татарстан Республикасының Россия Федерациясендәге Тулы вәкаләтле вәкиле Равил Әхмәтшин исеменнән Сабира Галимованы 100 яшьлек юбилее белән Тулы вәкаләтле вәкил урынбасары Эмиль Фәйзуллин һәм вәкиллек хезмәткәрләре котлады.
Сабира әби кызы Нурия белән яши. Кунакларны алар өйдә, табын артында каршы алды. Эмиль Фәйзуллин ветеранга җылы сүзләр әйтеп, ТАССР төзелүнең 100 еллыгы уңаеннан Республика юбилееның истәлекле медален бүләк итте. Сабира әби игътибар өчен рәхмәт әйтте.
Аның балачагы һәм яшьлеге Татарстанда уза. Ул республиканың Яшел Үзән районында туган. Утызынчы — коллективлаштыру елларында алар Казанга күченә. Сугыш башланганчы, 1941 елга кадәр, Казан май комбинатында (1965 елда М. Вахитов исемендәге Казан химия комбинатына үзгәртелә) төрүче булып эшли. Сугыш елларында хәрби заводта станокчы була.
1946 елның февралендә Габдрахман Галимовка кияүгә чыга һәм яшь гаилә Мәскәүгә күченә — ире шунда яши һәм эшли торган була. Башкалада Сабира Галимова күп эш урыннарын алыштырган — икмәк заводында, өй аяк киемнәре фабрикасында һәм «Метталист» заводында эшләгән. Галимовлар ике ул һәм бер кыз тәрбияләп үстергән. Хәзер аны өч оныгы һәм ике оныкчыгы сөендерә. Ире 2001 елда вафат була. Алар 55 ел бергә гомер кичерәләр.
Олы яшьтә булуына карамастан, Сабира әби искиткеч формада — ачык акыллы, хәтере яхшы. 95 яшькә кадәр һәр иртә зарядка ясаганын сөйләде. Җәй кызы белән дачада үткәрә, бакча белән шөгыльләнергә ярата. «Мин хезмәттән рәхәт табам», — ди ул. Һәм нәкъ менә үзенең озак яшәү серен эштән дип саный.