Самат Ибраев: Фроловду президент кабыл алган (видео)
Жогорку Кеңештин депутаты Самат Ибраев 29-сентябрда парламентте кызуу талкууланган орусиялык банкир, эксперт Владимир Фролов тууралуу түшүндүрмө берди.
Ал "Азаттыктын" "Эксперттер талдайт" талкуусунда сүйлөп жатып, Фроловду президент Садыр Жапаров өзү кабыл алганын айтты.
"Садыр Нургожоевич өзү бул экспертти кабыл алып, өзүнүн экспертине да текшертип туруп, ушул адистин кесипкөй экенин билгенден кийин анан колдоо көрсөтүп жатат", - деди Самат Ибраев.
Ибраевдин айтымында, Фролов тууралуу аларда толук маалымат бар. Сингапурда бир нече жыл жашап, өзүнүн компаниясы бар экенин жана бир топ ийгилик жаратканын да айтты.
Парламенттин 29-сентябрындагы отурумунда Улуттук банктын төрагасы Толкунбек Абдыгулов кызматтан кетип, ордуна жаңы төрага шайлануу учурунда депутаттар арасында Саматбек Ибраев сунуштаган банк тууралуу мыйзам долбоору жана ага тартылган эксперт Владимир Фроловдун айланасында бир топ талаш-тартыш болгон.
Депутат Мирлан Жээнчороев да “эл аралык шылуундарды пайдаланган саясий топ Улуттук банкка “кара пиар” жасап, анын ичинде Жогорку Кеңештин трибунасын колдонуу менен Абдыгуловду кетиргендей картина жаралып калганын” айткан.
Саматбек Ибраев сунуштаган "Кыргыз Республикасынын Улуттук банкы" жана "Банкттар жөнүндө" мыйзам долбоору Кыргызстанда Финансылык технологиялар же кыскартып айтканда Финтех аттуу түшүнүктү киргизүүнү карайт.
Бул системалар мыйзамдаштырылса, фирмалар же жеке адамдар кайсы бир тиркемелер аркылуу банктын катышуусуз акча жүгүртүүгө мүмкүнчүлүк алат. Жарандарга эсеп ачып, аны тейлейт, насыя бере алат. Финтехтер кадимки банктар сыяктуу кеңсе ачууга, кампа курууга милдеттүү эмес болот.
Бул мыйзамды коргоо боюнча жыйындарга орусиялык Владимир Фролов аттуу жаран да катышып жаткан. Акыркы жолу, 24-сентябрда парламенттин имаратында өткөн коомдук угууга ал видео аркылуу онлайн катышып, ойлорун айткан. Жогорку Кеңештин сайтындагы маалыматта Фролов экономика илимдеринин доктору, профессор экени маалымдалган. (BCh)