Татарстанда яңгырлы һәм яшенле җылы һава торышы булачак
(Казан, 9 июнь, «Татар-информ»). Иртәгә, 10 июньдә, Татарстанда җылы, әмма тотрыксыз һава торышы булачак. Бу турыда Татарстан Гидрометеорология һәм әйләнә-тирә мохитне күзәтү үзәге хәбәр итә. Республикада алмашынучан болытлы һава торышы көтелә. Атмосфера йогынтысында төнлә һәм көндез урыны белән, шулай ук Казанда да кыска вакытлы яңгыр булачак. Шулай ук яшен булуы да ихтимал. Төньяк-көнчыгыштан һәм көнчыгыштан уртача тизлектә җил исәчәк. Яшен вакытында җил секундына 15-18 метрга кадәр көчәергә мөмкин. Төнлә һава температурасы 11-16 градус җылы булачак. Көндез һава температурасы +23…+28 градуска кадәр җылытачак. Бигрәк тә Татарстанның көнчыгыш районнарында җылырак булачак. Синоптикларның якынча мәгълүматлары буенча, якындагы көннәрдә республика территориясендә җылы, әмма тотрыксыз һава торышы булачак. Янә кыска вакытлы яшенле яңгыр һәм көчле җил көтелә.