Алексей Арзамазов: Милли әдәбиятта тарихи роман жанрында иҗат итүчеләр азайды
(Казан, 9 июнь, «Татар-информ», Зилә Мөбәрәкшина). Филология фәннәре докторы Алексей Арзамазов милли әдәбиятларда тарихи романнарның чыгуы ят күренешкә әйләнде дип саный.
«Тарихи роман жанрын милли әдәбиятлар системасында сирәк күрәбез. Мәсәлән, фин-угор әдәбиятында 35 яшьтән яшьрәк язучылар романны язарлык хәлдә түгелләр, чөнки туган телләрен тирәнтен белмиләр», — дип сөйләде ул «Мәдәни якынаю шартларында милли әдәбиятлар» түгәрәк өстәлендә .
Алексей Арзамазов тарихи роман язарга алынучы кеше үз теленең борынгы синтаксисын, канатлы гыйбарәләрен, сурәтләү чараларын белергә тиешлеген әйтте. «Туган телдән ераклашкач, язучылар әдәбиятның билгеле бер жанрларында иҗат итүдән мәхрүм кала. Бу күренеш башка халыкларның әдәбиятында да бар», — ди ул.
Галим, шулай ук, һәр милли әдәбиятның тәрҗемә ителүгә мохтаҗ булуын да искәртте. «Тәрҗемә эше Советлар союзы чорында актив алып барыла иде, ә хәзер милли әдәбиятлар вакуумда үсә. Без күрше халыкларның нәрсә иҗат итүләрен белмибез, алар безнекен белми. Шул рәвешле, кызыксыну да югала», — дип йомгаклады ул сүзен.