Фатирындагы янгыннан коткарылган Казан кешесе аңына килгән һәм табиблардан качкан
(Казан, 11 март, «Татар-информ», Павел Климчак). Күп катлы йорттагы янгыннан коткарылган Казан кешесе аңына килгән һәм ашыгыч ярдәм табиблары яныннан качып киткән.
«Татар-информ»га ТР буенча Россия Гадәттән тыш хәлләр министрлыгы Баш идарәсе матбугат хезмәтендә хәбәр итүләренчә, бүген 101нче янгын сагы номерына Богатырев урамындагы торак йортта янгын чыгу турында хәбәр килгән. Икенче каттагы фатирларның берсе янган, янгын мәйданы 30 квадрат метр тәшкил иткән.
Һәлакәт урынына килгән янгын сүндерүчеләр дүрт кешене битлек ярдәмендә саф һавага алып чыккан, шулай ук янган фатирның хуҗасын коткарганнар.
Ир-атны ашыгыч ярдәм бригадасына тапшырганнар, әмма ул аңына килү белән ярдәм күрсәтү урыныннан кача. Табиблар аның исерек булуын хәбәр итә. Ир-атның шәхесе әлегә билгеләнмәгән.
Тиздән янгын сүндерелгән. Янгын чыгу сәбәбе ачыклана.