Мостай Кәрим повесте буенча «Отряд Таганок» фильмы Татарстанда күрсәтеләчәк
(Казан, 4 март, «Татар-информ»). Уфада Мостай Кәрим повесте буенча «Отряд Таганок» фильмы премьера алдыннан күрсәтелде.
«Башинформ» хәбәр итүенчә, премьерага Мостай Кәримнең кызы Әлфия ханым, төшерү процессында катнашучыларның барысы да, Башкортстанның мәдәни җәмәгатьчелеге, журналистлар һәм блогерлар килгән. Картина бер үк вакытта ике залда һәм беренче тапкыр — рус телендә күрсәтелде.
2019 елның октябрендә «Отряд Таганок» фильмы Башкортстанның халык шагыйре, күренекле язучы һәм драматург Мостай Кәримнең 100 еллыгына багышланган юбилей чаралары кысаларында башкорт телендә күрсәтелде.
Фильмның киң прокатка чыгуга пандемия комачаулады. Картина төрле номинацияләрдә 12 бүләк, шул исәптән иң яхшы фильм, иң яхшы режиссура, сценарий, актерлар ансамбле өчен алды.
Фильм «Аскарфильм» студиясе, Башкортстан Республикасы хакимияте һәм мәдәният министрлыгы, Әмир Абдразаков исемендәге «Башкортстан» киностудиясе ярдәмендә төшерелде. Сценаристлар - Айдар Акманов, Мәгъфүр Тимербулатов, Дамир Йосыпов. Икенче режиссер - Руслан Юлтаев, рәссам-куючы - Айгөл Бәйрәмгулова, оператор- куючы — Вячеслав Ложковой, композитор — Камил Абдуллин, костюмнар буенча рәссам — Алия Хансен, реквизит буенча рәссам - Анастасия Андреева.
2 мартта фильмның премьерасы Мәскәү кино йортында булды. Бүген, 4 мартта, Башкортстан, Татарстан һәм Россиянең кайбер башка төбәкләреннән 130 кинотеатрда фильм прокаты башлана.