Татарстан Министрлар Кабинеты республикадагы айныткыч хезмәтләренең бәясен билгеләде
(Казан, 29 сентябрь, «Татар-информ»). Татарстан Министрлар Кабинеты республика айныткычларындагы бер көннең бәясен билгеләде. Шул хактагы карарны ТР Премьер-министры Алексей Песошин имзалаган.
«Махсус учреждениеләрдә җәмәгать урыннарында исерек хәлдә йөргән, мөстәкыйль рәвештә хәрәкәтләнү һәм әйләнә-тирәдә ориентлашу сәләтен югалткан, медицина ярдәме күрсәтүгә мохтаҗ булмаган затларга хезмәт күрсәтүнең норматив бәясен билгеләргә», - диелә документта.
2021 елда махсус учреждениедә бер көн «утырып» чыгу – 613,53 сум, 2022 елда – 615,02 сум, 2023 елда 616,55 сум тәшкил итәчәк.
Шул ук вакытта, коэффициент һәр муниципалитетта аерылып торачак. 2021 елда ул Чаллыда – 1,080453, Казанда – 1,080609, Азнакай, Әлмәт, Бөгелмә, Алабуга, Зәй, Лениногорск, Түбән Кама һәм Чистай районнарында – 1,729984, Яшел Үзән районында 1,793439га тигез булачак.
Карарда шулай ук республика айныткычларындагы урыннар саны да билгеләнгән. Казандагы махсус учреждениедә – 40, Чаллыда – 20, муниципаль районнарда ун урын каралган.