Түбән Камада юл һәлакәтендә ана белән бала үлгән
(Казан, 25 сентябрь, «Татар-информ»). Түбән Камада «промзона» автоюлының 3 нче километры тирәсендә юл һәлакәте була. Биредә хатын-кыз һәм аның баласы үлә. Бу турыда Татарстан прокуратурасының матбугат хезмәте хәбәр итте. Җиңел машинада ир-ат, хатын-кыз һәм бала була. Бу автомобиль йөк машинасына бәрелә. Бала белән ана урында ук үлә, ир-атны хастаханәгә алып китәләр, ул реанимациядә.
Йөк машинасын йөртүче исән, ул җитди имгәнмәгән. Авария урынына Түбән Кама прокуроры Ольга Купова барган. Фаҗиганең сәбәпләре ачыклана.