Күпфункцияле үзәкләрдә өлкәннәргә электрон сервисларны үзләштерергә ярдәм итәчәкләр

(Казан, 23 сентябрь, «Татар-информ»). Татарстанда Күпфункцияле үзәкләр 28 сентябрьдән 3 октябрьгә кадәр өлкән яшьтәге кешеләргә электрон сервисларны үзләштерүдә ярдәм күрсәтү атнасы уздырачак. Бу хакта ведомствоның матбугат хезмәте.хәбәр итә. «Белгечләр РФ һәм ТР Дәүләт хезмәтләре, Пенсия фонды порталларында шәхси кабинетны ничек булдырырга, дистанцион чит ил паспортын рәсмиләштерергә, машина йөртү таныклыгын алырга, хезмәт стажы һәм хезмәт хакы турында архив белешмәсенә заказ бирергә, торак-коммуналь хуҗалыклар өчен түләргә, табибка кабул итүгә язылырга, пенсионерларга тиешле ташламалар турында ничек белергә кирәклеген күрсәтәчәк», — дип билгеләп үттеләр матбугат хезмәтендә. Ведомствода, күп кенә хезмәтләрне электрон рәвештә алу өчен, ЕСИА да исәпкә алу кирәк, дип аныкладылар. Бу хезмәт өлкән яшьтәге кешеләргә өстенлекле тәртиптә күрсәтеләчәк. КФҮ хезмәткәрләре «Минем документлар» офисларын кабул итү залларында урнаштырылган кунак компьютерларында укулар үткәрәчәк. Акция күпфункцияле үзәкнең барлык 59 филиалында да узачак. Эш графигы буенча теләсә кайсы уңайлы вакытта мөрәҗәгать итәргә мөмкин.