Арчадагы Галиәсгар Камал исемендәге Сикертән мәктәбендә 51 бала укый — «Мәгариф»
(Казан, 9 сентябрь, «Татар-информ», «Мәгариф» , Илһам Фәттахов). Сикертән мәктәбендә дә яңа уку елын ныклы әзерлек белән башлап җибәргәннәр. Быелгы уку елында Арча районының Галиәсгар Камал исемендәге мәктәбендә 51 бала белем ала. Укучыларга 12 укытучы тирән белем бирә. Мәктәпнең татар теле һәм әдәбияты укытучысы Нәгыймова Равилә Рәфкать кызы әйтүенчә, сагынып көтеп алган уку елының башлануы белән балаларны котларга дип Сеҗе авыл җирлеге рәисе Хәмидуллин Рөстәм Вагыйзь улы, янгын бүлекчәсеннән Мәхмүтов Илшат Ришат улы, «Ак барс агро» ширкәтенең бүлек җитәкчесе Гарипов Ленар Фәтхрахман улы, Сикертән мәдәният йорты мөдире Минһаҗева Равия Әкрам кызы килгәннәр иде. Чакырылган кунаклар укучыларга үзләренең матур теләкләрен әйткәннәр. Традицион линейка ачык һавада — мәктәп каршындагы мәйданда узган. Урамда Белем көне бәйрәме бик күңелле үтте, ди Равилә ханым.