څېړنه: په افغانستان کې نړیوالو مرستو د پام وړ اغېز نه درلود
د افغانستان د مدني ټولنې مجتمعې د ژنیو کنفراس په درشل کې د یو راپور په خپرولو سره ویلي دي چې نړیوالو مرستو د پام وړ اغېز نه درلود.
د افغانستان مدني ټولنو مجتمعې ( مجما) د څېړنې موندنې ښیې، چې افغانستان سره د نړیوالو مرستو د پام وړ اغېزمنتیا نه درلوده.
دې بنسټ خپلې موندنې د یکشنبې په ورځ کابل کې اعلان کړې او ويې ويل، چې دغه څېړنه یې په ۳۱ ولایتونو کې د ۱۷۵۰ کسانو سره د مرکو پر بنسټ چمتو کړی.
د مدني ټولنو مجتمعې د پروګرامونو مسوول ایوب شهریار ازادي راډیو ته وویل، د نړیوالو مرستو د بې ګټې تمامېدو ترڅنګ په هېواد کې د بشر حقونو تر پښو لاندې کول هم جدي ستونزه ده.
هغه زیاته کړه: "د نړیوالو مرستو د اغېزمنتیا په اړه ۵۰ سلنه په دې باور دي چې یادې مرستو لږ ه اغېزمنتیا درلوده، د بشر حقونو په اړه ۸۹.۷ سلنه خلکو ویلي، هغوی چې د بشر ضد جرمونه يې کړي او ظلم یې کړی باید د قانون منګولو ته وسپارل شي."
د جګړې ختمېدل، له طالبانو سره د مذاکراتو له لارې سولې ته رسېدل، امنیت، ښه حکومتوالي، اداري فساد سره مبارزه، او نور په دغه څېړنه کې د خلکو غوښتنې راخیستل شوي دي.
په څېړنه کې راغلي چې ۹۳.۵ سلنه مرکه کوونکي د طالباني نظام غوښتونکي نه دي.
په ورته وخت کې د افغانستان د جمهوري ریاست ویاند صدیق صدیقي وايي، افغانستان کې نړیوالي مرستې په ښه توګه لګول شوي او په بېلابېلو برخو کې ښه پرمختګونه شته دي.
هغه زیاته کړه: "افغانستان سره د نړیوالې ټولنې مرستو ډېره ښه اغېزمنتیا درلوده او نن چې کوم پرمختګونه د نړیوالې ټولنې د ملاتړ د افغانستان د دولت او خلکو د هڅو په پایله کې وینو پرته له شکه د پام وړ دي."
د ژنیو ناسته د لسګونو هېوادونو او نړیوال سازمانونو په ګډون ، د فنلند، افغانستان او ملګرو ملتونو په ګډ کوربه توب په مجازي توګه سبا د سویس په ژنیو ښار کې ترسره کېږي.
دې کنفرانس کې د ګډون په موخه حکومتي پلاوی د بهرنیو چارو د وزیر حنیف اتمر په مشرۍ د ناستې ځای ته رسېدلی دی.
په دې ناسته کې نړیواله ټولنه له افغانستان سره خپلې مالي ژمنې او دولت هم د راتلونکو پنځو کلنو لپار خپل بروګرامونه اعلانوي.