Кыргызстанда үй-бүлөлүк зомбулук 12% көбөйдү
Бул тууралуу Эмгек жана социалдык өнүгүү министрлигинин Үй-бүлөлүк зомбулуктан коргоо жана координациялоо бөлүмүнүн башчысы Айкөл Турганбаева 21-январда «Азаттыктын» түз ободогу «Эксперттер талдайт» программасында билдирди.
Адистин айтымында, 2020-жылы коронавирус пандемиясына байланыштуу киргизилген карантин учурунда зомбулук 65% көбөйдү. Турганбаева буга карантин учурунда жарандардын баары үйдө отуруп калганы, окуунун онлайн форматка өтүшү, аялдардын түйшүгү көбөйгөнү өңдүү жагдайлар негизги себептерден болгонун айтты.
Ал үй-бүлөлүк зомбулукту азайтуу жана алдын алуу боюнча министрлик атайын иш-чаралардын топтомун иштеп чыкканын, зомбулуктун курмандыгы болгон балдар менен жер-жерлерде социалдык кызматкерлер иштеп жатканын белгиледи.
Үй-бүлөдө аялдарга каршы жасалган зомбулук - Кыргызстанда кеңири талкууга түшкөн социалдык маселелердин бири. 2021-жылдын январь айында эле Ысык-Көл облусунун Каракол шаарында эки жаш келин өз жанын кыйып, өмүр менен кош айтышты. Экөөнүн артында жети бала калды. Түп районунда төрт баланын энеси күйөөсүнүн зомбулугунун курмандыгы болду.
Ички иштер министринин орун басары Октябрь Урмамбетов 20-январда Жогорку Кеңештин жалпы жыйынында былтыр өлкөдө үй-бүлөлүк зомбулук боюнча 9025 факты катталганын, анын 947си гана кылмыш деп катталып, сотко жиберилгенин билдирди. Бул катталган фактылардын 10% гана түзөт.
2019-жылы өлкөдө үй-бүлөдөгү зомбулукка байланыштуу беш миңден ашуун факт катталган. 580 иш сотко чейинки териштирүүгө алынган.
Парламент бул күнү үй-бүлөлүк зомбулукка айыпталгандарга жазаны күчөткөн мыйзам долбоорун экинчи окууда кабыл алды. Киргизилип жаткан жаңы өзгөртүүгө ылайык, жабырлануучу тосмо арыз жазганына карабай ага зомбулук көрсөткөн киши жазага тартылат. (NT)