Жоошев: Жээнбековдун камерасын тинтүүдө кызматкерлер орой мамиле жасашкан

Адвокат Замир Жоошевдин "Азаттыкка" билдиргени боюнча, Кой-Таш окуяларына байланыштуу шектелип, №1 тергөө абагында отурган Равшан Жээнбековдун камерасын текшерүү учурунда абак кызматкерлери орой мамиле кылышкан.

Адвокаттын маалымдаганына караганда, камактагы саясатчы 28-январда түн ичинде капыстан жана орой жүргүзүлгөн тинтүүгө байланыштуу Жаза аткаруу мекемесинин кызматкерлеринин үстүнөн Кыйноого каршы улуттук борборго кайрылды.

Ал эми Жаза аткаруу мамлекеттик кызматынын өкүлү Самат Калыков абактарда тыюу салынган буюмдарды аныктоо үчүн пландуу жана капыстан текшерүүлөр болуп турарын "Азаттыкка" маалымдаган.

Равшан Жээнбеков 12-декабрда кармалып, ага Жазык кодексинин 244-беренеси («Барымтага алуу») жана 264-беренеси («Массалык башаламандык уюштуруу») боюнча айып коюлган. 14-декабрда айыптоого 309-берене («Бийликти күч менен басып алуу») кошулган.

Ал 7-8-августта мурдагы президент Алмазбек Атамбаевди кармоо маалында Кой-Таш айылында болгону үчүн ага чейин ИИМге бир канча жолу суракка чакыртылган. Жээнбековдун тарапкерлери ал Кой-Ташта мыйзам бузбай, арачы болуп жүргөнүн белгилеп жатышат.

26-декабрда Бишкек шаардык соту Жээнбековду 9-февралга чейин камакта калтырган. Ал азыр Бишкектеги №1 тергөө абагында камалып турат. (TSh/ZKo)