Эрдоган АКШ жана Орусиянын президенттери менен сыймыктанарын айтты
Түркиянын мамлекет башчысы Режеп Тайып Эрдоган АКШ президенти Дональд Трамп менен Орусиянын лидери Владимир Путинди дүйнөлүк лидерлер деп атап, алар менен сыймыктана турганын билдирди. Анын айтымында, "Европада ушундай мыкты жолбашчылар жетишпей жатат".
10-декабрда Анкарадагы университетте студенттер менен жолугушууда Режеп Тайып Эрдоган Европада "лидерлик кризис, боштук бар" деп эсептей турганын билдирди. Ал Трампты ачыктыгы үчүн мактоого татыктуу деп санайт.
“Каалайсыңарбы же жокпу, Трамп мырза бул - белгилүү ысым. Анын жашыруун күн тартиби жок. Ал мага иштерди так жана ачык айтат. Мен да ага ачык айтам”.
Эрдоган Путинди да "жашыруун күн тартиби жок", Түркияга карата мамилеси ачык деп сыпаттады.
Түркиянын башчысы ал урматтаган дүйнөлүк үчүнчү жолбашчы деп Катардын эмири шейх Тамим бен Хамад Ал-Танини атап, аны жакыр мамлекеттерди колдогон жаш, күжүрмөн лидер деп сыпаттады.
Режеп Тайып Эрдоган буга чейин Мухаммед пайгамбарды жана азыркы Түркиянын негиздөөчүсү Мустафа Кемал Ататүрктү ага дем берген тарыхый инсандар деп билдирген. Ошондой эле ал Германиянын мурдагы канцлери Герхард Шредерди, Италиянын экс-премьер-министри Сильвио Берлусконини да мактаган жайы бар.