Карамушкина: парламенттин тарашын талап кылабыз
Жогорку Кеңештеги КСДП фракциясынын мүчөсү, депутат Ирина Карамушкина парламенттин тарашын талап кылышарын бүгүн, 3-июлда мурдагы президент Алмазбек Атамбаев жана анык тарапкерлери Бишкекте өткөрүп жаткан митинг учурунда билдирди. Ал «парламенттин соңку жыйыны Кыргызстанда мыйзам бузулуп жатканда депутаттарга ишенүүгө болбой калганын көрсөттү» деп билдирди.
«Медиа Форумда» өткөн митингге Алмазбек Атамбаев өзү да катышууда. Иш-чарага Жогорку Кеңештин депутаттары Ирина Карамушкина, Анвар Артыков, Карамат Орозова, президенттик аппараттын мурдагы башчысы Фарид Ниязов, КСДПнын азыркы төрайымы Асел Кодуранова жана мурдагы парламент депутаты Равшан Жээнбеков өңдүү саясатчылар келди.
Уюштуруучулар митингде бийликке «Эски элита кетип, жаңы элдик лидерлер келсин!» деген чакырык ташташарын айтышкан.
Президент Сооронбай Жээнбеков же анын аппараты Атамбаев менен анын тарапкерлеринин митинги тууралуу маалыматка расмий комментарий бере элек.