Бишкекте "Коопсуз кичирайон" долбоору ишке кирди
Бишкек шаарынын №6 кичирайонунда "Коопсуз кичирайон" долбоору ишке кирди. Бул тууралуу Бишкек шаардык мэриясынан кабарлашты.
Долбоордун бет ачары 23-апрелде шаардык ички иштер башкармалыгынын Октябрь райондук бөлүмүндө өттү.
Бөлүмдүн башчысы Уланбек Султанов анда билдиргендей, аталган кичирайондун аймагындагы көчөлөргө 72 камера орнотулду. Жабдуулар криминогендик жагдайларды, адамдар чогулган жерлерди эске алуу менен бөлүштүрүлдү.
Долбоор кылмыштарды болтурбоо максатын көздөйт. Тасмалар 30 күнгө чейин сакталып турат.
Октябрь районунун акими Максим Ситников долбоордун ачылышында кабарлагандай, камераларды орнотууга калаа бюджетинен 1,5 миллион сом бөлүнгөн. Ал "Коопсуз кичирайон" долбоору башкалаанын №11, №12, "Асанбай" жана башка райондоруна да жайылтуу аракеттери көрүлүп жатканына токтолду. (ErN)