Ўзсаноатқурилишбанк хорижий кредит линияларини ишга тушурди.

Президентимизнинг 2018 йил 21 декабрдаги “Тижорат банкларининг молиявий барқарорлигини таъминлаш, фаолияти самарадорлигини ошириш ва кредит сиёсатини такомиллаштириш чора-тадбирлари тўғрисида”ги қарорида бу борада мавжуд муаммо ва камчиликларни бартараф этишнинг аниқ йўллари белгиланиб, молия муассасаларининг ушбу йўналишдаги фаолияти янада кучайтирилди. Бугунги кунда Ўзсаноатқурилишбанк тизимида иқтисодиётнинг йирик тармоқларидаги лойиҳаларни молиялаштириш мазкур қарорда қайд этилган вазифалар доирасида кенг кўламда амалга оширилмоқда. Хорижий кредит линиялари фаол жалб қилиниб, молиявий имкониятлари оширилмоқда, кредит портфелини тақсимлашда юқори самарали лойиҳаларга катта эътибор қаратилмоқда. Бизнес-жараёнларни автоматлаштириш, шу жумладан, корпоратив мижозларга мўлжалланган масофавий хизматларни янгилаш ишлари кучайтирилмоқда. Бугун айнан мана шу масалалар юзасидан бугун Миллий матбуот марказида Банк томонидан ташкил этилган “Иқтисодиётнинг йирик тармоқларидаги лойиҳаларни молиялаштириш борасида белгиланган чора-тадбирлар, эришилган натижа ва муаммолар ечими” мавзуидаги матбуот анжуманида ана шулар хусусида ахборот берилди. Таъкидланганидек, Ўзсаноатқурилишбанк томонидан катта ишлаб чиқариш (ёки хизмат кўрсатиш)га эга корхоналарнинг лойиҳалари Банк ўз маблағларидан ташқари чет эл молия муассасалари кредит линиялари ҳисобидан молиялаштирилмоқда. Бунда Европанинг Сredit Suisse (Швейцария), Raiffeisen Bank International AG (Австрия), Landesbank Baden-Wuerttemberg, Commerzbank, ODDO BHF, KFW Ipex-Bank (Германия), Газпромбанк, «AK BARS Bank» (Россия), «Shinhan Bank» (Жанубий Корея), шунингдек, Хитой, Туркия ва Жанубий Корея Эксимбанклари билан ҳамкорлик йўлга қўйилган. Бундан ташқари, Банк Осиё тараққиёт банки маблағлари ҳисобидан Давлат инвестиция дастурларидан ўрин олган лойиҳаларни молиялаштиришда фаол қатнашмоқда. Яқин истиқболда Халқаро Ислом савдо-молия корпорацияси билан ҳамкорликда исломий молиялаштириш бўйича хизмат кўрсатишни режалаштирмоқда. Ишлаб чиқариш объектларининг атроф-муҳитга зарарли таъсирини камайтириш ва энерго-тежамкорлигини оширишга қаратилган “Green banking” тизими асосида молиялаштириш механизмларини жорий этишга тайёргарлик кўрилмоқда. Йирик тармоқларидаги лойиҳаларни молиялаштиришда Банк қошида ташкил этилган Инвестиция фаолиятини мувофиқлаштириш ва лойиҳаларни бошқариш маркази фаолияти алоҳида аҳамиятга эгадир. Марказда маҳаллий тадбиркорлар ва чет эллик инвесторларга “Ягона дарча” тамойили асосида ҳам техник, ҳам молиявий томонлама “кредит супермаркети” сифатида хизматлар кўрсатилмоқда. Ўзсаноатқурилишбанк томонидан корпоратив мижозлар учун жорий қилинган замонавий интерактив хизматлар хусусида тўхталиб, 24/7 режимида ишловчи онлайн банк ҳамда “Корпоратив интернет-банкинг” дастури маҳсули бўлган хорижий валютани онлайн буюртманома асосида сотиб олиш имконини берувчи хизматларни қайд этиш мумкин. Шунингдек, банк тизимида мижозларга масофадан хизмат кўрсатишга мўлжалланган “Корпоратив интернет банкинг” ва “UzPSB Mobile Business” дастурлари ҳам янги хизматларга мос равишда такомиллаштириб борилмоқда. Лобар Мирзо