Татарстанда социаль-мәдәни билгеләнештәге 544 объектны ремонтлаганнар
(Казан, 12 декабрь, «Татар-информ»). 2020 елда гамәлдә булган 31 инженерлык системаларын капиталь ремонтлау һәм модернизацияләү программасының бүгенгә Татарстанда егермесе төгәлләнгән. Татарстан Хөкүмәте Йортында узган киңәшмәдә республика төзелеш, архитектура һәм торак-коммуналь хуҗалык министры Марат Айзатуллин шул хакта сөйләде. Барлык муниципаль районнар белән видеоконференцэлемтә режимындагы киңәшмәне Татарстан Президенты Рөстәм Миңнеханов үткәрде. Бу турыда республика җитәкчесенең матбугат хезмәте хәбәр итә. «Төгәлләнгән программалар кысаларында социаль-мәдәни билгеләнештәге 544 объект ремонтланды, 728 объект һәм 419,5 км инженер челтәрләре яңартылды», - диде министр. Аның сүзләренчә, күп фатирлы йортлар бу санга керми. 2020 елда капиталь ремонт программасы паспорты нигезендә 1063 йорт ремонтланырга тиеш. Дәүләт торак инспекциясе 1004 торак объектын кабул итте. Су бүлеп бирү системаларын модернизацияләү программасы буенча ел ахырына кадәр 27 объектның 5 объекты буенча эшләр төгәлләнергә тиеш. Бер объектта капиталь ремонт эшләре, 4 объект буенча проект эшләре төгәлләнеп килә. Коммуналь комплексны модернизацияләүнең калган 4 программасы тәмамланды. «Мәгариф» тармагында 2020 елда 4 программа кысаларында 464 объект ремонтлана, 437 бинада эшләр төгәлләнгән. Медицина стационарларында капиталь ремонт программасы буенча 11 объектта эш тәмамланган. Сәламәтлек саклау объектларына капиталь ремонт программасы буенча бер объект калган, 7 объект ремонтланган. Авыл хуҗалыгында 7 программаның ахырына кадәр кошчылык фермаларын капиталь ремонтлау программасы тәмамланмаган. Бер объектта эш бара. Яшүсмерләр клубларына капиталь ремонт программасы буенча ике объектта төзелеш-монтаж эшләре бара. 14 объектта эш төгәлләнгән. «Башка социаль программалар» блогында өч программаны гамәлгә ашыру дәвам итә. Бер объект Татарстан буенча Эчке эшләр министрлыгы карамагындагы биналарга капиталь ремонт ясау программасы буенча ремонтлана. Илкүләм гвардия гаскәрләренең федераль хезмәте идарәсе объектларына капремонт программасы буенча 14 объектның икесендә генә эш төгәлләнмәгән. Социаль хезмәт күрсәтү биналарын капиталь ремонтлау программасына кергән 37 объектның 36сы файдалануга тапшырылган инде.