Орусиянын абактарында 10 миңден ашуун тажиктер жазасын өтөп жатат

Москвадагы тажик элчилигинин маалыматына караганда ушул тапта Орусиянын түрмөлөрүндө 10 миңден ашуун Тажикстандын жарандары жазасын өтөп жатат. Бул тууралуу «Азаттыктын» тажик кызматы кабарлады.  

Орусияда ондогон тажик жаранынын үстүнөн сот иштери жүрүп жатат. Алардын көбү терроризм жана экстремизмге шек саналгандар.

"Азаттыктын" тажик кызматынын өз булагы «алардын канчасынын терроризм жана экстремизмге тиешеси бар экени белгисиз, бирок соңку эки-үч жылда мындай иштер көбөйдү» деп айтып берген.

Орус бийлигинин маалыматы боюнча бул өлкөдө 1 миллионго чукул тажикстандыктар жашайт.  

2013-жылдан бери орус маалымат каражаттарына террорчулукка байланыштуу тажикстандыктар кармалганы жөнүндө маалымат көп чыга баштады. Мындай айыпка жыгылгандардын айрымдары өз мекенине экстрадицияланса, калгандары орус түрмөлөрүндө жаза өтөшөт.

Укук коргоочулардын белгилешинче, орус полициясы терроризмге шектүү кимдир бирөөнү кармаганда көпчүлүк учурда алардын жакындарына кабар бербей коёт.  

Өткөн аптада Москванын аскер соту Борбор Азиядан барган 11 кишини, анын ичиндеги беш тажик жаранын алты жылдан 18 жылга чейин эркинен ажыратты.

Аларга "«Ислам мамлекети» террордук тобуна мүчө болгон" деген кине коюлган. Айыпкерлер 2016-жылы Москвада жана Санкт-Петербургда кармалган.