Помпео Орусияда кармалган АКШ жараны боюнча үн катты
АКШнын мамлекеттик катчысы Майк Помпео Орусияда америкалык жарандын тыңчылыкка шектүү катары кармалышы тууралуу комментарий берди.
Ал Кошмо Штаттардын Орусиядагы консулдугунун өкүлдөрүнө Пол Уилан менен жолугууга уруксат берилет деп күтүп жатканын, эгер ага тагылган айыптар негизсиз болсо, анда Вашингтон Москвадан өз жаранын кое берүүнү талап кылаарын 2-январда Бразилиядагы сапары учурунда айтты.
Помпео АКШ Орусиядан өз жаранынакандай айыптар коюлуп жатканын так түшүндүрүүнү да сураганын кошумчалады.
Орусиянын Федералдык коопсуздук кызматы америкалык атуул тыңчылык кылып жаткан учурда кармалганын 31-декабрда билдирген.
Пол Уиландын үй-бүлөсү 1-январда Эркин Европа / Азаттык радиосунун колуна тийген билдирүүсүндө орус тараптын дооматтарын четке каккан. Алар Уилан тыңчы эместигин белгилешип, ал Москвага үйлөнүү үлпөтүнө катышуу үчүн барганын айтышкан.
Уилан 28-декабрдан бери үй-бүлөсүнө байланышка чыккан эмес. Орус тарап анын иши боюнча толук маалымат бере элек.
48 жаштагы Пол Уилан Америкадагы автоунаа тетиктерин саткан "BorgWarner" аттуу компаниянын глобалдык коопсуздук боюнча директору. Мичиганда жашаган америкалык жаран кезинде АКШнын деңиз флотунда кызмат өтөгөн.
Ал АКШда орусиялык Мария Бутина Кремлдин агенти катары иш алып барганын мойнуна алгандан бир нече аптадан кийин кармалып олтурат.