Новости за 22.09.2018

Бохам хиллера Сызранехь. Керла шо тIекхачар даздеш сакъоьруш хиллера зуда а, цуьнан тIехьийза стаг а. Малар а молуш Iаш, къамел тIедаьлла хилла Нохчийчоьнна, хаам бо ktv-ray.ru сайто. Зудчо дикачу агIор бийца болийна шена бевзаш болу цу республикера бахархой. Амма стагана иза ца дезна. Ша Нохчийчохь бина тIом бийца волавеллачу цо, "адам ден мел атта ду хаьий хьуна" аьлла, чоже урс тоьхна зудчунна. Чов а лаьцна араялаелла иза, амма цул тIаьхьа кхетамчура яьлла. Наха сихонца лоьраш кхайкхар бахьана долуш дийна йисина дархо. Читать дальше...

"Исламан пачхьалкх" олучу тобано шена тIелаьцна ГIажарийчохь тIеман парадехь дина тIелатар. Цунах лаьцна хаам бо Reuters агенталло. Цо билгалдоккху, тIемоша цхьа а тоьшалла далийна цахилар. Терроран тIелатар дар шена тIелоцу ша аьлла хаам бинарг ю Iаьрбийн радикалан "Къоман дуьхьало" цIе йолу тоба. ТIаьххьарчу хаамашца, Ахваз гIалахь тIеман парадехь герз диттина вийна 24 стаг. Царна юкъахь эскархой боцурш зударий а, бераш а ду. 60 гергга стаг чевнаш йина ву. ГIажарийчоьнан пачхьалкхан зорбанан гIирсаша яздарехь, тIелатар дина 4 стаг вийна. Читать дальше...

ПIаьнказ чIожехь юкъахъяьккхина "Панкисоба" олу тIаьхьарчу хенахь хIора шарахь дIахьош йолу фестивал. Цунах лаьцна хаам бо Кавказ.Реаллиин корреспонденто. Меттигера нохчий (кистой) реза ца хилла цу даздарехь дакъалаца. Уьш тIехIиттина Мачаликашвили Малхазана, шен кIант Темирлан вийначу нахана таIзар дар доьхуш пикет дIахьош волчу. Мачаликашвили Темирлан вийра ПIаьнгазахь полицин операци дIахьош болчу гуьржийн ницкъаллин структурийн белхахоша 2017-чу шарахь. "Панкисоба" даздеш Iедал дара хIора шарахь. Читать дальше...

ГIалгIайчохь 37 шо долу полицин белхахо лаьцна, наркотикаш лелорна шеко йолуш. Цунах лаьцна хаам бо Кавказ.Реалиино. Талламхоша дийцарехь, кху беттан 19-чохь Малгобекехь героин олу наркотик эцна хилла цо. ГIалгIайчоьнан чоьхьарчу гIуллакхийн министраллан чоьхьарчу кхерамазаллан декъан белхахоша лаьцна иза, наркотик схьа а йоккхуш. Полисхо талламан изоляторехь ву. Цхьаболчу хаамашца, иза ву Малгобекан полицин декъан белхахо Гуражев Адам.

Iамеркерчу Калифорнехь ресторанашкахь дихкина мутт луш цуьнца телатан биргIа ялар. Низам тIеэцна цу штатехь Дуьненан хIорд бехбарца къийсам дIабахьарца доьзна. Иза болх бан долалур ду 2019-чу шарахь Дечкен-беттан 1-чу дийнахь дуьйна. Дехкар хьакхалуш дац карахь дIахьо кхача бухкучу ресторанех. Амма кхечу меттигашкахь телатан биргIачухула мутт мала луучуьнан дезар ду иза еха официанте. Низам дохорна гIуда тухур ду 300 доллар.   Экологаша далочу терахьашца, 2012-чу шарахь Дуьненерчу хIорда чохь IаьIнера 165 гергга миллион тонн нехаш. Читать дальше...

Оьрсийчуьрчу артистан Михайлов Стасан концерт хила езаш яра Соьлж-ГIаларчу "Колизейхь" кху беттан 24-чохь. Амма Инстаграмерчу цу гIишлонан официалан агIона тIехь хаам гучубаьлла, концерт хир яц аьлла. Цунах лаьцна яздо "Чечня сегодня" сайто. Концерте билеташ эцначаьрга дехар дина иза вовшахтоха дагахь хиллачара, царах делла ахча схьаэца дуьйла аьлла. Цхьана версица, Михайловн концерте хьажа лууш болу нах дукха кIезиг хилла Нохчийчохь, ткъа билеташ дохкалуш ца хилла. Артистан официалан сайта тIехь хаам бу... Читать дальше...

Iамеркин Европехь юкъаметтигаш дӀакхехьарехула а, кхерамазаллехула а йолчу вовшахкхетаран (ОБСЕ) миссино ша саготта хилар хаийтина Нохчийчуьрчу бакъонашларъярхочунна Титиев Оюбана тIехь дIахьош йолу кхел къевлинчу роже яккхарна. Цхьаьнатоьхначу Штаташа дIахеца веза боху "Мемориалан" регионерчу декъан куьйгалхо. Еарин дийнахь Шеларчу кхело дихкира юкъараллан векалшна суд йоьдучу чохь хилар.