«Манас» аэропортунан мыйзамсыз акча ташылганын айткан чек арачылар издөөдө
Мамлекеттик чек ара кызматынын мурдагы офицерлери Айбек Камчыбеков менен Марлис Осмонбековго издөө жарыяланган. Бул тууралуу 11-февралда Жогорку Кеңештин Укук тартиби, кылмыштуулук менен күрөшүү жана коррупцияга каршы күрөш комитетинин жыйынында Мамлекеттик чек ара кызматынын төрагасы Уларбек Шаршеев депутат Искендер Матраимовдун суроосуна жооп берип жатып билдирди. Анын айтымында, жайында жеке адамдардын маалыматтарын соцтармакка чыгарып жиберишкени үчүн алардын иши Аскер прокуратурасына өткөрүлгөн.
«Экөө «Манас» аэропортундагы көзөмөл-өткөрүү жайында кезмет башчылары болгон. Жай айында адамдардын жеке маалыматтарын социалдык түйүндөргө чыгарып жибергени үчүн алардын иши Аскер прокуратурасына өткөрүлгөн. Тергөө иштери башталганда дезертирлик кылып качып кетишкен. Аскер прокуратурасы учурда ишти иликтеп жатат. Издөө жарыяланган. Суракка чакырылган, иш жүрүп жатат. Бул купуя маалымат, ошондуктан сизге жеке кабарлайбыз», - деп сөзүн аяктады ал.
Мамлекеттик чек ара кызматынын эки офицери - майор Айбек Камчыбеков менен улук лейтенант Марлес Осмонбеков «Манас» аэропортунан нак акча чет өлкөгө мыйзамсыз чыгарылып турганын ырастап чыгышкан. Экөө тең аэропортто кезмет башчы катары жарым жылдан ашуун иштеген.
Алар өздөрүнө коюлуп жаткан «адамдардын жеке маалыматтарын жарыялап жиберген» деген айыпты четке кагышкан. Айбек Камчыбеков декабрда «Азаттык» менен байланышып, өмүрүнүн коопсуздугу үчүн мекенден чыгып кетүүгө аргасыз болушканын айтып берген.
Кыргызстандан тышка мыйзамсыз жолдор менен ири суммада акча ташылып турганын күч органдары «Азаттыктын» иликтөөлөрүнөн кийин мойнуна алышты. Улуттук банк, Экономикалык кылмыштарга каршы күрөш боюнча мамлекеттик кызмат (Финансы полициясы) Кыргызстандан сыртка ташылган акча боюнча күч кызматтарына маалымат берилгенин билдиришкен. Ал эми Башкы прокуратуранын өкүлү Кумарбек Байдылдаев 2010-2015-жылдар аралыгында кытайлык уйгур ишкер Айеркен Саймаити жана анын жубайы 2010-2015-жылга чейин 932 миллион доллардан ашык каражатты Кыргызстандан сыртка которгонун 11-февралда маалымдады. Ал бул тууралуу 11-февралда парламенттеги депутаттык комиссиянын жыйынында билдирди.
2019-жылы «Азаттык» радиосу, «Уюшкан кылмыштуулукту жана коррупцияны иликтөө долбоору» (OCCRP) жана анын Кыргызстандагы өнөктөшү «Kloop» маалымат агенттиги чогуу жүргүзгөн «Бажыдагы миллиондор: карактоо жана калкалоо» жана «Көмүскө акча ташыгандар кербени» деген иликтөөлөрдү жарыяланган.
Анда көпчүлүккө белгисиз Хабибулла Абдукадыр аттуу үй-бүлөнүн карго компаниясы кыргыз бажысындагы көмүскө схемалар аркылуу ири суммада акчаны адалдаштырып, миллиондогон доллар өлкөдөн мыйзамсыз чыгарылып турганы көрсөтүлгөн. Иликтөө ал иштерге Мамлекеттик бажы кызматынын жетекчисинин мурдагы орун басары Райымбек Матраимовдун тиешеси бар экенин ашкерелеген.
Иликтөөдөгү башкы каармандардын бири Айеркен Саймаитини кийин Стамбулда белгисиз кишилер атып кетишкен.
Парламентте депутаттык комиссия түзүлүп, мурдагы жыйынында Финансы полициясынын, УКМКнын өкүлдөрү, «Азаттык Медиа» мекемесинин жетекчиси катышып, маалымат берген. (ZKo)