Россиядә медицина битлекләрен көзен дә киеп йөрергә туры килергә мөмкин
(Казан, 22 июнь, «Татар-информ»). Россия гражданнарына Covid-19 таралуын булдырмау өчен генә түгел, сезонлы авырулар йоктырмас өчен дә битлек режимын сакларга кирәк булачак. Беренче каналда «Познер» программасына биргән интервьюсында Россия вице-премьеры Татьяна Голикова шундый фикер белән уртаклашты. «Безгә үз тормышыбызны ничектер үзгәртергә һәм куркынычсызлык чараларын үтәргә туры киләчәк. Битлек киеп йөрергә, санитайзерлардан файдаланырга кирәк», — дигән Татьяна Голикова. Вице-премьер сүзләренчә, бүгенге көндә илдә шәхси саклану чаралары җитмәү проблемасы хәл ителгән. Коронавирус тарала башланганда булган дефицит илнең пандемиягә әзер булмавы белән аңлатыла. «Дөньяның бер генә иле дә киңкүләмле коронавирус пандемиясенә әзер түгел иде, шул исәптән безнең ил дә искәрмә түгел», — диде спикер.