په پاکستان کې له کورونا نور ۳۴ کسان مړه شوي، واکسين وررسېدونکي دي
د کورونا وايرس په اړه د معلوماتو حکومتي ويبپاڼې ترمخه د جنورۍ تر ۳۱مې پورې د کورونا وايرس مثبتو کېسونو شمېر پنځه لکه څلور څلوښت زره اته سوه دريالسو ته رسيدلی دی.
په ملک کې په تېره يوه ورځ کې د کورونا وايرس نزدي شپاړس سوه مثبت کېسونه ریکارډ شوي دي. خو له کوويډ۱۹ ناورغۍ نیزدي پنځه لکه کسان بېرته رغېدلي هم دي. دا وخت په پاکستان کې د کوويډ۱۹ فعالو کېسونو شمېر دري ديرش زره ده.
واکسين کله تر خلکو رسېږي؟
د پاکستان حکومت وایي، د فرورۍ لومړۍ نېټې څخه په هېواد کې د کورونا وایرس واکسینو ورکولو کمپاين پېلوي. چارواکي زیاتوي، چینایي کمپنۍ ساینو فام د پنځه لکه واکسینو ورکولو ژمنه ورسره کړې ده چې لومړنی خوراک به یې د جنورۍ پر ۳۱مه دغه هېواد ته ورسېږي او پر دې سربېره به له یوې بلې چینایي کمپنۍ هم د کورونا وایرس واکسین تر لاسه کوي.
د وزیر اعظم روغتیایي چارو سلاکار ډاکټر فيصل سلطان د جنورۍ پر ۲۷مه په اسلام اباد کې يوې خبري غونډې ته وویل: "ساینو فارم او کېنساینو له کمپنیو سره مو پر واکسینو خبرې په وروستي پړاو کې دي. په دې کې د ساینو فارم کمپنۍ واکسین پينځه لکه خوراکه موږ ته د جنورۍ پر ۳۱مه را رسيږي. دا واکسین په عرب هېوادونو کې هم استعمالېږي چې د کورونا وایرس خلاف له ۸۰ څخه تر ۸۵ فیصده اغېزمن دي. دویم واکسین کېنساینو دی، که د دې نتیجې ښې راوځي نو ۲۰ میلیونه خوراکونه به یې له چینه راغواړو."
تر دې وړاندې په روانه میاشت کې د پاکستان حکومت د کورونا وايرس مخنيوي لپاره په بېړني ډول د روسي واکسينو "سپوتنيک پينځه" د استعمال منظوري هم ورکړې وه.