بلخ کې اعتراض کوونکو د برمته شوي ماشوم خوشې کېدل وغوښتل
د دغې مظاهرې یوه تنظیموونکي محمد کمال ګونش ازادي راډیو ته وويل، سره له دې چې له ۱۵ ورځو راهیسې د ولسمشر لومړي مرستیال امرالله صالح د تښتول شوي عبدالروف د قضیې د څېړو مسئولیت په غاړه اخېستی، خو تر دې دمه دغه قضیه کې هېڅ ډول پرمختک نه دی راغلی.
مظاهره چیانو د پراخو لاریونونو ګواښ وکړ، له ډلې یې کمال ګونش وايي: "موږ د ولسمشر د مرستیال د حسن نیت په پاس یوه بله اوونۍ هم صبر کوو، څو عبدالروف خوشې شي او که خوشې نه شو، په نهو شمالي ولایتونو کې به د پراخو لاریونونو په ترڅ کې سړکونو ته راووځو او لارې به بندې کړو."
په همدې حال کې د بلخ والي محمد فرهاد عظیمي نن یکشنبه رسنیو ته په یوه خبري ناسته کې وويل چې د دغه تښتول شوي ماشوم خوشې کېدو لپاره یې هڅې ګړندۍ کړي دي.
دی وايي، هغه انسان تښتونکی یو پیاوړی ټیم لري او تر دې دمه د هغوی د ځای د تثبیت لپاره کابو شل عملیاتونه بې پایلې شوي.
ده زیاته کړه: "موږ بې شمېره عملیاتونه ترسره کړل چې انسان تښتوونکو له اطلاع وروسته دا سیمې پرېښې وې. خو هڅه مو دا ده چې دا عملیات بریالي او عبدالروف ازاد شي."
د بلخ والي وویل چې دا عملیات د دولت تر کنټرول لاندې سیمو او د طالبانو تر واکمنۍ لاندې ولسوالیو کې ترسره شوي.
هغه وايي چې د دغه تښتول شوي ۹ کلن ترکمن ماشوم د اختطاف په تور ځیني دولتي مامورینو هم تر پوښتنو لاندې راغلي.
ښاغلي عظیمي زیات کړې چې تر دې دمه د عبدالروف د برتمه کېدو په پېښه کې د لاس لرلو په تور له ۲۰ زیات کسان نیول شوي او په زندان کې دي.