جو بایډن د لوړې له مراسمو وروسته: ډیموکراسي غالبه شوه
د بایډن تر لوړې مخکې د هغې لومړۍ مرستیالې کماله هارېس لوړه وکړه او نوموړې لومړنۍ مېرمن او بیا لومړنۍ تور پوستې ده چې د لومړۍ مرستیالۍ څوکۍ ته رسېږي.
د لوړې دا مراسم د کرونا وبا تر سیوري او تر کلکو امنیتي تدابیرو لاندې ترسره شول.
بایډن له لوړې وروسته ولس ته په وینا کې وویل: "یووالی د مخته تګ یوازنۍ لاره ده" او زیاتهیې کړه چې "ډیموکراسي غالبه شوه."
بایډن پر کانګرس د ډونالد ټرمپ د پلویانو یرغل او ټاکنیزو ناندریو ته په اشارې وویل، امریکا سختې ورځې تېرې کړې.
بایډن زیاتوي: "وروستیو اوونیو او میاشتو موږ ته له درده ډک درس راکړ، دلته واقعیت او د درواغو خبرې دي، د واک او ګټې لپاره درواغ ویل شوي دي، موږ د امریکایانو او په ځانګړې توګه د رهبرانو، داسې رهبرانو په توګه چې د اساسي قانون د عزت او د ولس د ساتنې ژمنې مو کړې دي، مسؤلیت لرو چې د حقایقو ننګه وکړو او درواغو ته ماتې ورکړو."
بایډن وویل، دا د امریکا، ډیموکراسۍ، تاریخ، هیلو، نويوالي او حل لارو ورځ ده.
بایډن د امریکا له پولو بهر خلکو ته هم پيغام درلود او ويېویل، له نورو ملتونو سره یووالی به بېرته ورغوي.
ده وویل: "موږ به بېرته یووالی ورغوو، له نړۍ سره به یو ځل بیا یوځای شو، نهیوازې د پرونیو ستونزو د حل په خاطر، بلکې د نن او سبا د ننګونو لپاره."
د لوړې په دغو مراسمو کې ډونالد ټرمپ ګډون نهو کړی. دا په تېرو ۱۵۲ کلونو کې لومړی ځل دی چې د امریکا یو ولسمشر د خپل ځای ناستي د لوړې مراسمو کې برخه نهاخلي.
دغو مراسمو کې د امریکا درېیو پخوانیو ولسمشرانو جورج ډبلیو بوش، بېل کلېنټن او بارک اوباما ګډون کړی وو.
د امریکا بل پخوانی ولسمشر جیمي کارتر چې ۹۶ کاله عمر لري، نهدی توانېدلی چې دغو مراسمو کې ګډون وکړي.
د ټرمپ لومړي مرستیال مایک پنس او یو شمېر نور جمهوريپال قانون جوړوونکي بیا د لوړې مراسمو کې حاضر وو.
ټرمپ پرون د امریکا په وخت سهار ۸ او ۱۵ دقیقې له سپینې ماڼۍ ووت او په یوې هليکوپټره کې هغو مراسمو ته ولاړ چې د ده د خدای پامانۍ په هدف جوړ شوي وو.
ټرمپ که څه هم خپلو خبرو کې د جو بایډن نوم یاد نهکړ، خو نوې ادارې تهیې د ښو چارو هیله وښوده.
ده ویلي:" د پام وړ کارونو بنسټیې تر شا پرېښی دی."
د خدای پامانۍ له مراسمو وروسته ټرمپ، مېرمنیې او د کورنۍ نور غړي یې د هوایي ځواک په الوتکه کې فلوریډا ته ولېږدول شول چې هلته بېرته د امریکا د یوه ځانګړي اوسېدونکي په توګه خپل ژوند پيل کړي.